Белгиленнген кезиуден кечикмезни сюзгендиле

Белгилисича, Тырныаууздагъы «Геолог» спорт-саулукъ кючлеу арада жангыртыу ишле бардырыладыла. Ала не кезиуде болгъанларын эм къаллай даражада ётгенлерин тинте, жууаплы специалистле бла бирге Элбрус районну администрациясыны башчысы Отарланы Мухтар инспекция бардыргъанды.

Районну физкультура эм спорт комитетини таматасы Жаппуланы Магомет, къурулуш ишлени бардыргъанла бла бирге Отар улу битеу залланы, спортчула кийинирча отоуланы эм инженер коммуникацияланы болумларын тинтгенди. Подряд организацияланы келечилери бла уа салыннган борчла тийишлисича тыйгъычсыз бардырылгъанларын бла къалгъанларын сюзгенди. Ушакъны кезиуюнде белгиленнген кезиуден артха къалмазгъа кереклиси чертилгенди.

Эсигизге салайыкъ, «Геологда» къурулуш ишле «Эллени не жаны бла да айнытыу» деген федерал программаны чеклеринде бардырыладыла.