Тахта кёгетледен бла чеплеуден бай тирлик

Шимал Кавказстатны эсеплерине кёре, былтыр Къабарты-Малкъарда сабанлыкълагъа бёлюннген жерлени уллулугъу 281,8   минг гектаргъа жетгенди. Аны асламысын неда 216 минг гектарны жазлыкъла аладыла. Ол толусунлай буруннгу жылда кёрюмдюге келишеди.  

Саулай алып айтханда,  чеплеу ёсдюрюлген жерлеге 1 минг гектар къошулгъанды.  Алай бла  19 минг гектарда 34,8 минг тонна тирлик алыннганды. Мында да 1,6 процент ёсюм эсленеди. Аны бла бирге хар гектардан 18,8 центнер чыкъгъанды, буруннгу жыл бла тенглешдиргенде, ол 4,1 центнерге артыкъды.   Аны баш сылтауларындан бири уа "Халкъла аралы кооперация эм экспорт" миллет проектге кирген  "Агропромышленный комплекс продукцияны  экспорту" регионал проектни эм "Эл мюлкге бёлюннген жерлени хайырланыу эм комплекс халда мелиорация бардырыу" къырал программаны чеклеринде  жыл сайын сугъарылгъан жерлеге къошула баргъаныды.

Эсге сала айтсакъ, чеплеуню иги кесеги Прохладна, Бахсан, Май эм Зольск районлада ёсдюрюледи. Андан хазыр продукция чыгъарырча  жарашдырып да кёбюсюнде  кесибизде предприятияла  кюрешедиле.

Тахта кёгетчиликни юсюнден айтханда,  былтыр бахчаладан бла теплицаладан 466,7 минг тонна тирлик алыннганды. Ол буруннгу жыл бла тенглешдиргенде,  101,2 процентге кёпдю.

Сагъынылгъан кезиуде тахта кёгетле ачыкъ бахчалада 16,5 минг гектарда ёсдюрюлгендиле. Орта эсеп бла алып айтханда, хар гектардан 271 центнер чыкъгъанды неда 2,6 процентге аслам.

Бюгюнлюкде республиканы аграрчылары "борщха" къошулгъан  тахта кёгетлени: хабуста, чюгюндюр, сохан эм картоф да иги кесек ёсдюредиле. Андан сора да, бадыражан бла наша да  иги кесек ёсдюрюледи,  ол санда теплица комплекследе.