Буруннгулу Кавказны бети

КъМР-ни Миллет музейинде  бу кюнледе  искусствону сюйгенлеге, аны бла бирге уа кеслери да ол ишге батханлагъа деп энчи кёрмюч ачылгъанды. «Гардарика Кавказа» фестивальны чеклеринде мастер-классла болгъандыла. Анда сынаулу художниклени башчылыгъында къонакъла  академиялы натюрмортла этерге юйреннгендиле.

Мастер-классланы атлары айтылгъан устала  Ленинградны  И.Е.Репин атлы художестволу академиясын бошап чыкъгъан,  сурат ишлеучю, дизайнер Василий Анисин эмда  художник-монументалист, (аны ишлери Россейдеча, кёп тыш къыраллада да белгилидиле),  Дмитрий Аверьянов бергендиле.

Художниклени дерслеринде анга къатышхан ким да натюрмортла ишлеп, кеслерини энчи техника амалларын да  ачыкълагъандыла. Дагъыда тюрсюн, жарыкълыкъ эмда композиция бла ишлеуню амалларын тинтгендиле. Дерслеге къатышханла  айтханларына кёре, бек багъалы билим эмда практика ишни алгъандыла, ала уа ишлеринде хайырланыргъа уллу себеплик этерикдиле.

Былайда чертип айтыргъа тийишлиди. «Гардарика Кавказа» деген  фестивальны чеклеринде  бардырылгъан быллай билим  бериу ишле «Пушкинни картасы» программаны жашауда бардырыуну хайырындан къураладыла. Ол а ары келген кёп адамгъа искусствону дуниясына батаргъа эмда чыгъармачылыкъ ишде сынау жыйышдырыргъа онг береди.