«Хар бизге тюшген саусуз аны къаршы жууугъу болуп къалады»

Республикалы клиника больницаны пульмонология бёлюмюнде ишлеген Къайгъырмазланы Алёнаны, Биттууланы Ибрагимни къызыны юсюнден,  кёп ариу сёз эшитирге боллукъду.  Газетде жазарымы уа шёндю анда жатханла тилегендиле. Алай ары дери да хапарым бар эди бу хунерли къызны билимлилигини, усталыгъыны, адамлыгъыны юсюнден. Анга сейир этерча да тюйюлдю: ол аурууну тохташдыра, андан амал таба билиу бла кёплеге болушханды, юйюрлерине, ишлерине да къайтырча этгенди. Анга шагъатха жаланда ма бу юлгюню келтирсек да тамамды.

Узакъ тау элледен биринде жашагъан Ахметхан иши бла Екатеринбургга барады. Анда сууукъ болуп ауруйду. Алгъа кесине багъаргъа кюрешеди, алай хали осалдан-осалгъа кетип, врачлагъа барады. Аны олсагъат больницагъа жатдырадыла, къолларындан келгенни да этедиле, болсада жукъ жарамайды.

Жууукълары юйюнде, жеринде ёлсюн деп, аякълары бла больницагъа баргъан адамны, сыртындан жатдырып, артха, Нальчикге, алып келедиле. Сора республикалы клиника больницаны пульмонология бёлюмюнде аламат врачла бардыла деп эшитип, ары элтедиле. Ма мында Ахметхан Алёнаны къолуна тюшеди...

Артда ол адам былай хапар айтханды: «Самолётдан тюшюрюп, машинагъа миндиргенлеринде: «Къарачы терезеге, юйюнгдесе, мында уа къабыргъала да болушурукъдула. Шахарыбыз сен аны кёрмегенли бютюн айбат болгъанды. Кюз арты нечик ариуду»,- деп, кёлюмю кётюрюрге кюреше эдиле жууукъларым.

«Алай кёзюме бир зат да кёрюнмей эди. Ол угъай да, асыры къарыусуздан, жашарыгъым окъуна келмей эди. Да сейирми эди, ауурлугъу жюз килограммдан артыкъ болуучу жашны къыркъгъа жетип, борбайлары къыркъылып тохтасала.

Элиме, юйюме элтигиз, анда ёлейим, деп тилейме. Артда айтханларына кёре, эсим да азады, аллай бир осалгъа кетген эди саулугъум. Екатеринбургдагъы больницадан бери сёлешип, бу боллукъ тюйюлдю, алып кетигиз дегенлерин да артда билгенме. Бир насыбым, Алёнаны къолуна тюшгеним. Бу назик къыз мени ол дуниядан къайтаргъанды. Аны манга салгъан къыйынын жашагъан ёмюрюмде унутмам. Сабийлеге да аны эгечигизча кёрюгюз, деучюме».

Бюгюнлюкде Ахметхан кийик сау болуп, ишлеп айланады. Уллу шахарда врачла болушлукъ эталмагъан адамгъа гитче Къабарты-Малкъарны республикалы больницасында ёсюмю артыкъ бийик болмагъан, алай ишин тынгылы билген таулу къыз аягъы юсюне салгъанды.

Башында айтханымча, пульмонология бёлюмде кеслерине бакъдыра тургъан бир къауум адамны тилеклери бла ары барама. Эрттенликде сагъат сегизден бир кесек атлагъанды. Врач алыкъа келген болмаз деп, эшик аллында тохтап, алайдан озгъаннга арсарлы болуп сорсам: «Угъай, мындады, ординаторскийдеди»,-дейди.

Мен ары башымы къаратханлай, Алёна, жарыкъ болуп, аллыма келеди. Ёлген эгечим Зояны да эсине тюшюреди, гитче заманчыгъымда къулакъларымы ол тешген эди деп, уллу хурмет бла эсгереди.

Ол Хасанияда мени эгечими къоншусу эди. Атасын, анасын да бек иги таный эдим. Ала бир да болмагъанча огъурлу адамла эдиле. Бир кере баргъан эдим да Ибрагимни аллына жумуш бла, къолундан келгенни, келмегенни да этген эди. Аллай атаны бла ананы къызы осал къылыкълы болур амалы жокъ эди. Жарсыугъа, ала экиси да, жаннетли болсунла, эртте  ауушхандыла.

Къыз а къарындашы бла баш тутаргъа, жашаугъа къабыргъасын жарашдырыргъа кюрешгенди. Бюгюнлюкде аты айтылгъан врач-пульмонологду, къарындашын да юйдегили этгенди, кеси да баш иеси бла къызчыкъ ёсдюреди.

Алёна Къабарты-Малкъар къырал университетде жюреклеге бакъгъан врачха окъугъанды. Алай практиканы кезиуюнде стационарлада ишлей кетип, бу больницаны, бёлюмню, коллективни сайлап, бери къайтханды. Аны уа кардиология арагъа чакъырыр ючюн да къалмагъандыла.

Къайсы больницаны бёлюмлериндеча, мында да къыйын саусузла терк-терк тюбейдиле. Бирлери аякълары бла келе эселе, башхаланы кётюрюп келтиредиле. Ма аллайла аурууларын тереннге оздургъанладыла. Ала бла бютюн къаты кюреш бардырыргъа тюшеди врачха.

- Бирде эки саусузну да диагнозу бир кибикди.Экисине да бирча къарайса, бирча дарманла да бересе, бири бир кесекден игиге айланады, башхасы уа - угъай. Аллайла бла къыйналыргъа тюшеди. Башха специалистлени да чакъырып къаратама, китаплада, Интернетде да тюрлю-тюрлю амалла излейме, саусуз иги болгъунчу, тынчлыгъым болмай къалады. Къыйын ауругъанны аягъы юсюне болуп кёрсенг а, къууанаса, сора сау кюнню ичинде кёлюнг кётюрюлюп айланаса, -дейди хунерли къыз.

Мен кёп иги врачны таныйма, аланы хар бирине да ёлюмге юйренирге боллукъмуду, деп соргъанма. Барысы да бирча жууаплайдыла: «Хар аллынга келген адамны кёзлери эсингдедиле, Аллах сакъласын ала аллынгда жабылсала, сен да бир тюрлю амал эталмай къалсанг, ма ол заманда кесинги бир бош затха санайса. Ёлюмге аллай затла ючюн юйреналмайса».