Дерслери бла чекленип къалмай

Сарбашланы Римма, Нёгерланы Укайны къызы, Къабарты-Малкъар эл мюлк академияны экономика бёлюмюн бошагъандан сора , Нальчикде  ол заманда 11-чи номерли  «Къурулушчу» лицейге (бусагъатда ол колледжди) ишлерге киреди. Андан бери талай жыл озгъанды. Ол студентлени экономиканы, бухгалтер эсепни, багъалы  къагъытла бла ишлеуню, финансла жюрютюуню жашырынлыкъларына юйретеди.

Аны окъуучулары бусагъатда бирери бирер жерде баш бухгалтерле, бухгалтерле, экономистле да болуп ишлейдиле.  Кеслерини энчи ишлерин къурап, аны жетишимли  бардыргъанла да аз тюйюлдюле.

-Ишин Римма Укаевнача билген, студентлерине аныча къайгъыргъан адамгъа алыкъа тюбемегенме. Ол жангы амаллагъа эс бургъанлай, аланы излегенлей, ишинде хайырланыргъа кюрешгенлей турады. Бухгалтер эсепни бек уста биледи. Бухгалтерлени араларында, алгъынча  конкурсла бардырылсала эдиле, аны озарыкъ киши чыкъмазлыгъына ишеклигим жокъду,- дейди бизни бла ушагъында коллледжни алгъыннгы директору, бусагъатда да анда ишлеген Заудин Суншев.

Ол айтханнга кёре, окъуучула билимлерин ишде сынаргъа сюедиле. Аны себепли колледжде жылгъа бир неда эки кере факультетни ыйыкълары бардырыладыла. Ма ол  заманда энди боллукъ экономистле  кеслерини хунерлерин, не затха юйреннгенлерин кёргюзталадыла.

-Ол лекциясын окъуп кетгенледен тюйюлдю. Студентлени практика ишлерине кёз-къулакъ болады, тинтеди, ала болгъан предприятиялагъа, организациялагъа барады. Экономика жаны бла конкурсла бардырылсала, ол окъутхан жашла бла къызла жетишимли болмай къалмагъанларын да белгилемей жарамаз. Колледжибизни аты  иги  жаны бла республикада, андан тышында да айтылып келеди. Анда  уа Римма Укаевнаны юлюшю да уллуду,-дейди Заудин Суншев.

Жаш адамла да, бир бирлерине ал бермей, махтай эдиле преподавательлерин. Бош алай угъай, юлгюле да келтирип. «Республикада бардырылгъан конкурслада хорламларыбызда Римма Укаевнаны къыйыны бек уллуду. Аллай магъаналы эришиулени аллында ол, кюндюз угъай да, кече да тынчаймай тургъаннга ушайды. Биз да, аны  сокъурандырмаз ючюн, аямай хазырланып кюрешебиз. Аны  предмети тынч тюйюлдю, алай ол аны бизге сюйдюре билгенди»,- дейдиле.