Ата-ана эркинликлери сыйырылгъанлагъа юридический болушлукъ - хакъсыз

Къабарты-Малкъарны Жамауат палатасыны сайтында билдирилгенича, эркинликлери сыйырылгъан неда чек салыннган ата-аналагъа юридический болушлукъну хакъсыз этиуню юсюнден закон къабыл кёрюлгенди.

 Алай бла сабий омбудсменни юйюрлеге чачылмазгъа болушууну юсюнден башламчылыгъын Парламент къабыл кёргенди. Властьла оюм этгенлерича, ата-анала сюдге шагъатлыкъ къагъытланы кеслери алларына жыялмай кезиуле чыгъа-чыгъа турадыла. Законну мураты эркинликлери сыйырылгъан ата-аналаны санын азайтыуду эмда сабийлени юйюрлеге къайтарыуду. Бу амал ата-аналагъа жангы жашау башларгъа, бирге болургъа онг берликди.

Палатаны жамауат къоркъуусузлукъну жалчытыу, законлукъну сакълау эмда ОНК бла байламлыкъла жюрютюу жаны бла комиссиясыны башчысыны орунбасары, Россейни юристлерини биригиуюню регионда бёлюмюню толтуруучу директору Азрет Шапсигов айтханнга кёре, Къабарты-Малкъарда эркинликлери сыйырылгъан неда алагъа чек салыннган ата-анала юридический болушлукъну хакъсыз алаллыкъдыла, алай эсе да, бу онг бла хайырланыу регион законодательство бла къысха байламлыды, Парламентде башламчылыкъ къабыл кёрюлгени бла закон да толу кючюне киргенди.

 - Жангы документде болушлукъгъа тийишли инсанла кимле болгъанлары, алагъа себеплик не жаны бла этилирге кереклиси чертиледиле. Юридический себепликни талай амал бла алыргъа боллукъду. Аланы араларында баш жерде къырал системады, анга кёре, сабий жашагъан жердеги осуйлукъ органла ата-аналагъа адвокатха барырча къагъыт берликдиле. Себепликни Юстиция министерствону бла Социал къоруулау ведомствону регионда управлениялары, республикада Адвокат палата, адамланы эркинликлерин сакълау жаны бла коммерциялы болмагъан организацияла да этерикдиле. Бюгюнлюкде эркинликлени сюдню оноуу бла къайтарыргъа да жарайды. Аны ючюн жууап берлик орган болгъан жердеги сюдге иск жибериледи, сюдню жыйылыууна уа борчлу халда осуйлукъ органла бла прокурор да къатышадыла. Закон кючюне киргени бла башха жумушну да тамамларгъа керекди: ол регионда бу ишни тамамлауда энчиликле чыгъаргъа боллукълары ючюн адамлагъа ата-аналыкъ эркинликлерин къайтарырча юридический болушлукъну къайда эм къалай алыргъа боллукъларыны юсюнден билдириулени жетдириу бла байламлыды, - дегенди юрист.