Эм кючлюле демлеширикдиле

Билдиргенибизча, катыш единоборстволаны сюйгенлени бюгюн аламат саугъа сакълайды. Москвада АСА-200 турнирде Тюменланы Альберт бла Биберт кеси ауурлукъларында тюбешиуле бардырлыкъдыла. Альбертни Магомедрасул Гасанов бла сермеши бек магъаналыгъа саналады. Ала сыйлы бел бау ючюн сынарыкъдыла бир бирлерин. 

Тюмен улу сермеширик Магомедрасул Гасанов орта ауурлукъда АСА-ны чемпионуду. Кёпле ол UFC-де эриширге да хазырды дейдиле. Жаш спортну бу тюрлюсюне келгенли ол 24 тюбешиу бардыргъанды. Аладан 22-де хорлагъанды. Тюмен улудан ол жети килограммгъа ауурду эм юч сантиметрге да бийикди.

Тюменланы Биберт а Александр Грозин бла тюйюш бардырлыкъды.

Бу турнирге бизни республикадан дагъыда Азамат Пшуков бла Али Багов да къатышадыла. 

Тюзюнлей эфир «Матч! Боец» каналда 15 сагъат 05 минутда башланырыкъды. Анда спортну бу тюрлюсюнде алыкъын атлары кенг белгили болмагъан спортчуланы тюбешиулерин кёргюзтюрюкдюле.

 «Матч ТВ» каналда уа бизни жашла кирген къауумну сермешлери уа 20 сагъатда башланырыкъды.