Санкцияланы кетере барырла деп ышанырчады

Спортда озгъан жылны эсеплерин чыгъара, бек алгъа мен неде тохтаргъа сюе эдим десегиз, россейли спортчулагъа тынч-тынч халкъла аралы эришиулеге кеси къыралларыны байракълары эм гимнлери бла къайтыргъа эркин этгенлеринде. Не десек да, хар спортха келген инсан да кесин къыралдан тышында кёргюзтюрге сюеди. Ол себепден арт кезиуледе аллай жангылыкъла аслам бола барадыла. Сёз ючюн бек алгъа ол жорукъну 2022 жылдан бери тюрлендиргенини юсюнден Дзюдону халкъла аралы федерациясы билдиргенди.

Федерацияда белгилегенлерича, дзюдо спортну шуёхлукъну, мамырлыкъны, бир бирге хурмет этиуню багъалагъан тюрлюсюдю. 2022 жылны жаз башында Россейде бла Беларусьда бардырыллыкъ битеу эришиулени календарьдан чыгъарып, бу къыралланы келечилерини уа байракъларын бла гимнлерин салыргъа эркинликлери сыйырылгъан эди.

Бу умутландыргъан жангылыкъла бла байламлы оюмун КъМР-ни спорт министри Ислам Хасанов да билдиргенди.

- Саулай къыралыбызгъача, бизге да ол ахшы, кёп заманны сакъланнган жангылыкъды. Нек дегенде, Россейни дзюдодан жыйымдыкъ къауумунда республикабыздан жыйырмадан аслам адам тутушадыла. Жууукъ заманда спортчуларыбызны хайыры бла Россейни байрагъы халкъла аралы даражада кётюрюлюрюне ийнанама, - дегенди ол.

Онунчу декабрьде уа Олимпиаданы халкъла аралы комитети биринчиликлеге къатышырыкъ россейли эм белоруслу жаш спортчуланы алларында болгъан битеу тыйгъычланы кетергенини юсюнден билдиргенди. Ол да ашхы жетишимди дерчады. Алай ахыр сёзню уа спортну хар тюрлюсюню да федерациялары айтырыкъларын унутмазгъа керекди.

Спортну къайсы тюрлюсюнде да кючлюню ачыкълауду баш борч. Бизникиле къатышмай аллайланы ачыкълау а бир жубанчха ушайды. Сёз ючюн тутушууда, дзюдода, ауур атлетикада, боксда россейлиле не заманда да дунияда бек кючлюлеге санала келедиле. Сора ала болмай кючлюлени тохташдырыудан не хайыр? Баям, МОК да ол болумну алайлыгъын ангылап, санкцияланы бошайтыргъа деген оюмгъа алай бла келгенди.