Къырал программала республиканы онгларына келиширча

Къабарты-Малкъарны Правительствосуну кезиулю кенгеши аны Председатели Мусукланы Алийни башчылыгъы бла ётгенди. Анда къырал мюлкню тийишдириу, бюджетни тергеу, социал эмда экономика бёлюмледе жумушла бла жалчытыу  проектле сюзюлгендиле.

Алайды да, бегимледен бирине кёре Къабарты-Малкъарны къырал иелигинде болгъан ырысхыны приватизация этиу былтыр къалай ётгени сюзюлюп, эсепле чыгъарылгъандыла. Аны бла республиканы жер эмда ырысхы бла байламлы халланы министри Аслан Тохов шагъырейлендиргенди.

Дагъыда ишлери социал магъананы тутхан коммерциялы болмагъан организацияланы ишлерине себеплик этиу жаны бла оноула чыгъарылгъандыла. Сёз ючюн, «Къатынгдагъынга болуш» сабий-жаш тёлю волонтёр биригиуге Нальчикде мекям берилгенди. Ол аны  ишинде хакъ тёлемей хайырланырыкъды. 

Бир ненча буйрукъ бла къырал программаланы талайы республиканы 2026-2028 жыллагъа бюджетине келиширча этгендиле. Туризм эм курортла, жашау журт-коммунал мюлк, адамланы къыйын болумладан сакълау, экономиканы айнытыу, агъач мюлк, саулукъ сакълау, спорт бёлюмледе программаланы ахча бла жалчытыу мадарлагъа жангыдан къаралгъанды эмда тюзетиуле кийирилгендиле.

Регионну бойсунууунда болгъан, кеслери да энчи къорууланнганнга саналгъан табийгъат тийрелеге оноу этиуню къыйматын кётюрюр мурат бла талай правительстволу оноу тюрлендирилгенди. Сёз ючюн, ботаника бахча «Къабарты-Малкъар

Республиканы энчи къорууланнган табийгъат тийрелерини дирекциясы» учреждениягъа кёчюрюлгенди.

Жыйылыуда социал бёлюмде Акъылбалыкъ болмагъанлагъа осуйлукъ эмда попечительство этиу органланы ишлерин игилендирлик концепцияда белгиленнген жумушланы тамамлау жаны бла план къабыл кёрюлгенди. Кадрла бла байламлы тюрлениуле этилгенлери себепли Борчлу халда медицина страхованияны программасы жаны бла жер-жерли комиссияны къауумуна да тюзетиуле кийирилгендиле.

Кёп фатарлы юйлеге тынгылы ремонт этиуню программасына (болжалы 2049 жылда тауусулады) кийирилген тюрлениуле бла республиканы къурулуш эмда ЖКХ министрини къуллугъун толтургъан Андрей Журавлёв шагъырейлендиргенди.

Кенгешни ахырында Къабарты-Малкъарда курорт-туризм комплексни айнытыу жаны бла талай оноу этилгенди.