Къоранчланы азайтыргъа онг табылгъанды

Былтыр «Россети Северный Кавказ» – «Каббалкэнерго» биригиуню келечилерини кючю бла токну къоранчын 18,97 процентге азайтыргъа онг табылгъанды. Ол,  былтыр  бу заман бла тенглешдиргенде,  0,86 процентге азды, деп билдириледи энергокюч бла жалчытхан биригиуню пресс-службасындан. 

Аны бла бирге сагъынылгъан кезиуде абонентлени бар тюрлюсю да 1 614,1 миллион  киловатт-сагъат ток бла  жалчытылыннгандыла. Буруннгу жыл бла тенглешдиргенде,  ол 68,7 миллион  киловатт-сагъатха кёпдю. Сёз ючюн,  аллай бир электрокюч 50 минг адам жашагъан Зольск районну бир  жылына  жетерикди. Сагъынылгъан кезиуде Басхан  район бла Нальчик шахарны электросетьлери бирсиледен айырмалы болалгъандыла. Алада 1 ,39 эм 1,15  процентге дери ёсюм белгиленеди.
Ахшы жетишимлени тириликлери эм бу жаны бла система халда иш бардыргъанлары, ол санда рейдле ётдюргенлери  бла  болдуралгъандыла. 

Алай бла былтыр республикада ток урланнган эм эркинликсиз къошулуп хайырланнган шарт бла байламлы 268 шарт ачыкъланнганды. Саулай алып айтханда,  бузукъчуланы хатасындан 8,9 миллион киловатт-сагъат урланнганды.  Эсге сала айтсакъ, энергокючню  урлагъан  уллу хатагъа келтирирге боллукъду. Кеслери араларына къалай болса да тартылгъан  ток чыбыкъла   ёртеннге келтирирге, адамны саулугъуна хата салыргъа эм  къыйыры къоншулагъа окъуна жетерге боллукъду.

Алай бла токну урлагъанла Административ бузукъланы кодексини 7.19-чу статьясына тийишлиликде (Сетьлеге эркинликсиз къошулгъанларына эм токну эсеплеген приборсуз хайырланнганларына) тазир тёлерикдиле. Аны ёлчеми энчи иелилеге - 10-15 минг эм организациялагъа уа 100-200 минг сомгъа жетеди. Андан сора да, бир-бир аманлыкъчыла РФ-ны Уголовный кодексини 165-чи статьясына кёре, эки жылгъа тутулургъа да боллукъдула.

 - Токну тас болурдан сакълау бизни баш борчубуздан бири болгъанлай къалады. Аны себепли анга къажау турурча система халда мадар этиледи. Эсге сала айтсакъ, хайырланылгъан ток ючюн заманында этилген тёлеулени себеплиги  бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи, – деп билдиргенди "Каббалкэнерго" биригиуню таматасы Резуан Загаштоков.