Бир кечеге - артыкъда кёп бузукълукъ

Къырал автоинспекторла Нальчикде жолда жюрюуню жорукъларына бузукълукъланы ачыкълаугъа бурулгъан энчи жумушланы кезиуюнде бир кечеге жюз бла жарымдан аслам бузукълукъну ачыкълагъандыла.

 Рейдни аллында  Россейни МВД-сыны «Нальчик» управлениясыны таматасы, полицияны полковниги Геграланы Марат инспекторла бла ушакъ бардыргъанды, алагъа салыннган борчланы бла муратланы ангылатханды.

 Алай бла полициячыла бир кечени ичинде 146 бузукълукъну ачыкълагъандыла. Ол санда жолгъа кеф болуп чыкъгъанла, медицина тинтиуледен ётерге унамагъанла, машинаны жюрютюрге эркинликлери болмагъанла, сабийни жюрютгенде жорукъланы сакъламагъанла,  жаяу адамгъа жол бермегенле, светофорну къызыл белгисине ётгенле эм башха бузукълукъла этгенле  болгъандыла.    

Инспекторла жолда жюрюуге  къатышханланы барысын да сакъ болургъа, ПДД-ны сакъларгъа чакъырадыла. «Быллай тинтиуле мындан ары да бардырыллыкъдыла»,-деп билдиргендиле бизге ведомствону пресс-службасындан.