Битеу сёлешиу ингилиз тилде баргъанды

Бу кюнледе Къабарты-Малкъар къырал университетни тыш къыраллы тилле кафедрасы жарашдырып, «21-чи ёмюр: илму дунияны излемлери» деген ат бла конференция ётгенди. Ала уа анда ингилизча сёлешгендиле. Ол бу жол магистратура бёлюмледе окъугъанлагъа деп энчи къуралгъанды. Анга жаланда сагъынылгъан кафедраны башха-башха ызларында билим алгъанла угъай, бирси усталыкълагъа юйреннгенле да къатышханларын белгилерчады.

Жашау бюгюнлюкде тыш къыраллы тил къайсы сферада да керек болуп тургъанын эртте ачыкълагъанын эсге алсакъ, ол, айхай да, ахшы шартды. Алай бла жаш тёлю сайлагъан ишини жашырынлыкъларын терен ангыларгъа онг тапханы бла бирге  ингилизча бютюнда анда терминлени иги билирге онг табарыкъды.

Магистрантла кеслерини илму тинтиулерини эсеплерини юслеринден айтхандыла. Ала ушакъны ахшы бардыргъанлары уа преподавательлени, экспертлени да къууандыргъанды.

Эришиуге къатышханлагъа бир ненча ышаннга тийишлиликде багъа салыннганды: тыш къыраллы тилни къайсы даражада билгенлерине, сайлагъан темаларыны илму жаны бла жангычылыгъына, тинтиулери бла байламлы соруулагъа къалай жууап бергенлерине кёре. Бу жол алагъа эсепле чыгъаргъан эксперт а сагъынылгъан вузну биология, геоэкология эмда жанлары болгъан системаланы молекуляр-генетика мурдорлары кафедрасыны доценти, биология илмуланы доктору Диана Хашхожева болгъанды.

Алай бла конференцияда ахшы жетишимле кёргюзтюп, биринчи даражалы диплом эмда багъалы саугъала бла Диана Битохова («Менеджмент» ыз, 2-чи жыл) «Ресторан бизнесге башчылыкъ этиу» деген темагъа презентациясы ючюн белгиленнгенди.Экинчи жерни уа магистрантла Атабийланы Мариям бла Анна Бабочиева юлешгендиле. Таулу къызчыкъ «Къурулуш» ызда биринчи жылны билим алады. Сагъынылгъан эришиуге ол «Система образования пустот в монолитной плите» иши бла къатышханды. Анна уа «Филология» ызда (1-чи жыл) окъуйду. Ол орус жазыучу Фёдор Достоевскийни прозасында суратлау амалланы тинтгенди.

Ючюнчю оруннга да экеулен чыкъгъандыла. Тина Танашева («Госаудит» 1-чи жыл) бухгалтерия эсеплени халкъла аралы стандартлагъа кёре къалай санаргъа тийишлисини юсюнден сёлешгенди. Мадина Бугова уа («Къурулуш», 1-чи жыл) патчах юйюрле жюрютген багъалы ювелир комплектлени юслеринден хапарлагъанды.

Жыйылгъанланы кафедраны башчысы Рита Кенетова алгъышлап, кеслери филология неда лингвистика жаны бла угъай, башха ызлада ишлеп, алай а ингилизча иги билген специалистлени саны жылдан жылгъа ёсе баргъанын белгилегенди. Ала быллай конференциялагъа сюйюп келгенлерин, экспертлик этерге да ыразы болгъанларын айтып, къонакъларына да ыразылыгъын билдиргенди.

Андан сора да, магистрантла быллай тюбешиулеге къатыша, бюгюннгю алимни билими не даражада болургъа тийишлисине тюшюннгенлери бла бирге сагъынылгъан тилде шатык сёлеше, аны болушлугъу бла оюмларынгы кесгин айта билиу бусагъатдагъы болумлада къаллай онгланы бергенин ангылагъанларын чертгенди. Ала бардыргъан тинтиулени эсеплери ингилизча басмаланнганларыны къыйматыны юсюнден да хапарлагъанды.

Жаш адамла да быллай жумушну къурагъанлары ючюн кафедрагъа ыразылыкъларын билдиргендиле. Мындан арысында да ол, тёреге айланып, жашланы бла къызланы кеслерини усталыкъларында ахшы профессионалла болургъа кёллендирлигине ийнаннганларын айтхандыла.