Заманында тёлегенлени санына къошулгъанды

Былтыр Къабарты-Малкъарда жашагъанла хайырланнган электрокюч ючюн "Россети Северный Кавказ» - «Каббалкэнерго» биригиуге 9,2 миллиард сом тёлегендиле. Буруннгу жыл бла тенглешдиргенде, ол 1,3 миллиард сомгъа кёпдю. Саулай алып айтханда, хайырланылгъан электрокюч ючюн 90 процент тёлегендиле. 

Сагъынылгъан кезиуде эм иги кёрюмдю (98 процент) Зольск  район болдургъанды. Андан сора, Май бла Черек районла барадыла. Алада да 97 процент ёсюм эсленеди. 

Промышленный, аллай болмагъан эм эл мюлк предприятияла ток ючюн тёлеулерин - 100, энчи иелиле - 99, федерал, республикалы, жер-жерли бюджетледен жалчытылыннган организацияла - 101, 99 эм 98 процентге толтургъандыла.   

- Заманында тёлегенлени санына къошула баргъаныны баш сылтауларындан бирлерине – жамауат бла тири билдириу, ангылатыу иш бардырылгъанын, арт заманда абонентле электрон амалны да тири хайырланнганларын санарчады, - деп билдиредиле «Россети Северный Кавказ» - «Каббалкэнерго» биригиуде.

Болсада «Россети Северный-Кавказ» компаниягъа ток ючюн кёп заманны тёлемей тургъанла да аз тюйюлдюле. Бюгюнлюкде уллу борч этгенлени ал тизмесинде суу эм жылыу бла жалчытхан организацияла орналадыла. Саулай алып айтханда, быйыл биринчи январьгъа аланы 3,8 миллиард сом берликлери барды. Былтыр ала хайырланнган элекрокюч ючюн жаланда 24,5 процент тёлегендиле. 
 
Белгилисича, жашау журт-коммунал мюлк предприятияла ток ючюн борчларын жабалмагъанлары иги кесек заманны жарсытады. Аны себепли хайырланылгъан ток ючюн заманында этилмеген тёлеуле биригиуню ишине уллу чырмау саладыла. Ток ючюн заманында этилген тёлеулени хайырындан абонентлени электрокюч бла сылтаусуз жалчытырча эм аны качествосун ёсдюрюрча да мадар этиледи.

Бюгюнлюкде «Свет Онлайн» приложение кимге да тап болурча амалды. Аны себеплиги бла комиссиясыз тёлерге, эсеплеген приборда ненча санагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

Сервисни GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.
 «Россети Северный Кавказ»-«Каббалкэнерго» биригиуню келечилери токну къаллай бир саналгъанын айны 23-26 кюнлеринден кеч къалмай жиберирге эм тёлеулени уа айны онусуна дери этерге кереклерин эсге саладыла.

Эки ай чакълы тёлемеген инсанны биригиу ток ыздан кесерча эркинлик бериледи. Андан сора да, кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа ишлерин сюдге бериу, токну хайырланалмазча чек салыу киреди. Уллу кёллюлюк этгеннге, борчундан тышында, тазир тёлерге да тюшерикди. 

Электрокюч бла жалчытхан "Россети"биригиуге бир тюрлю соруу болгъан "къызыу ызгъа" сёлеширге боллукъду: 800-220-0-220 неда (къысха номерге 220).