Уллу кёллюлюк игиликге келтирмез

Былтыр «Россети Северный Кавказ» - «Каббалкэнерго» биригиу тёлемегенле борчларын жабарча   арбитраж эм башха сюдлеге 1,2 миллиард сом багъасына 4 769 иск бергенди. Андан 1,17 миллиард организациялагъа эм 30,4 миллион сом да энчи иелилеге жетеди.

Саулай алып айтханда, бирси заманлада этилген борчланы да эсге  алсакъ, энергетиклеге 2 707 иш бла байламлы 1,09 миллиард сом берликлери барды. 

Аны бла бирге бюгюнлюкде энтта да 682,5 миллион сом багъасына  1713 тарыгъыугъа къарала турады. Дагъыда 4156 абонент ишлерин сюдге дери жетдирмей, 371,8 миллион сом тёлегендиле.

Эсге сала айтсакъ, кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа ишлерин сюдге бериу, токну хайырланалмазча чек салыу да киреди. Сёз ючюн, эки айдан аслам тёлемеген абонент ток ыздан кесилирге боллукъду. Аллай адам ток бла жалчытылыныр ючюн, борчун толусунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми объектни къыйынлыгъына кёре болады. 
Сёз ючюн, энчи арбазны иеси 3 минг, организацияны таматасы уа 10 минг сом берликди. Уголовный жууапха тартылгъанла уа РФ-ни Уголовный кодексини 165-чи статьясына тийишлиликде эки жылгъа тутулургъа боллукъдула. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

Бюгюнлюкде «Свет онлайн» приложенияны иги кесек адам хайырланады. Сервисни GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Аны себеплиги бла комиссиясыз тёлерге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

«Россети Северный Кавказ»-«Каббалкэнерго» биригиуню келечилери токну къаллай бир ойнагъанын айны 23-26 кюнлеринден кеч къалмай жиберирге эм тёлеулени уа онусуна дери этерге кереклерин эсге саладыла.

Хайырланылгъан ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.