Мектепге дери билим бериуге – энчи эс

Россейни Жарыкъландырыу министерствосуну башламчылыгъы бла 2026 жыл къыралны билим бериу системасында «Мектепге дери окъутууну жылы» деген белги бла озарыкъды. РФ-ни премьер-министри Дмитрий Чернышенко 2019 жылдан бери федерал тутхучлулукъну себеплиги бла 1693 сабий сад ишленнгенин, ол шарт а юч жыллары толмагъан 267 мингден аслам жашчыкъгъа бла къызчыкъгъа садиклеге жюрюрге онг бергенин белгилегенди.

Жангы сабий садланы кёп санда хайырланыргъа берген алчы регионла бешдиле. Аланы санында Къабарты-Малкъар да болгъаны уа кёллендиреди, нек дегенде узакъ эллерибизде да, шахарлада тургъанладан кем болмай, сабийчиклеге хар не жаны бла да айныргъа ахшы онгла къуралгъанлары жамауатха ачыкъды.

Энди къыралда 2030 жылгъа дери эки мингден аслам мектепге дери билим берген махкемени тынгылы тапландырыргъа оноу этилгенди. Бек керекли жерледе уа жангыларын ишлерикдиле, эндиге дери белгиленнгеннге тийишлиликде, аланы саны уа жюзден аз боллукъ тюйюлдю. Андан сора да, ол зат керекли эсе, садиклени тапландыра неда аланы жангыларыны къурулушларын бардыра туруп, къагъанакъланы эмда аладан бир кесекге уллуракъчыкъланы да тутаргъа жарарыкъ бёлюмлени къураугъа эс бурургъа тийишлисини юсюнден да айтылгъанды.

Къабарты-Малкъарда мектепге дери билим бериуню юсюнден энчи айтсакъ, 2019 жылдан бери 55 жангы садик ачылгъанды, бешиси уа тынгылы тапландырылгъанды. Быйыл а аланы тёртюсюню къурулушун башларгъа белгиленнгенди. Ала «Юйюр» деген миллет проектни жашауда бардырыуну чеклеринде Кёнделенде, Эски Черекде, Басхан шахарда ишленирикдиле. Андан сора да, «Эл тийрелени комплексли айныулары» къырал программагъа кёре Баксанёнокда 140 сабийге жери боллукъ махкемени къурулушу андан ары бардырыллыкъды.

Садиклени барысы да бюгюнню излемлерине келишген жангы оборудование эмда тынгылы оюн майданла бла жалчытыллыкъдыла. Андан тышында да, республикада башха-башха элледе алты сабий садны тапландырлыкъдыла.

Кёнделенде ишленирик махкемеге жюз сабий жюрюрюкдю. Аны бёлюмлерини кеслеринде ойнарча, жукъларча, быстыр жууарча жерле, буфет да боллукъдула. Андан сора да, музыка залы, медицина бёлюмю, шёндюгюлю сурамлагъа кёре ашханасы, спорт залы, юйретиучюлеге кабинетлери да. Элде сабий садны къурулушун 2027 жылны аягъына бошаргъа белгиленнгенди.

Узакъ эллерибизде мектепге дери билим берген махкемеле, белгилегенибизча, кёзню къууандыра, кёллендирген да этедиле. Сёз ючюн, Огъары Басханда жангы садик 2021 жылны ноябринде ачылгъан эди. Ол кеси да «Демография» миллет проектни чеклеринде ишленнгенди. Дагъыда ол жылда аллай махкемени Жангы Малкъарда башланнган эди къурулушу, ол а хайырланылыргъа 2023 жылда берилгенди. Дагъыда бу проектни себеплиги бла белгиленнген кезиуде Терс-Къолда (40 сабийге), Огъары Малкъарда (40 сабийге) эмда Къашхатауда жангы сабий садла бла ясли бёлюмле хайырланылыргъа берилген эдиле.