Ишни эбин билген, огъурлу инсан

Муаед Азубеков Элбрус районда даражасы, сыйы жюрюген адамладан бириди. Ишини юсю бла районну эллеринде терк-терк бола, алада халны иги билгенди. Районну башха оноучулары бла бирге адамлагъа болушлукъдан бир заманда артха турмагъанды.

Аны жашау жолун а экиге бёлюрге боллукъду. Биринчи – окъууну бошап, Тырныауузну къурулуш майданларында ишлеп тебирегени. Экинчиси уа – район администрацияда уруннганы.

Жашау жолуну юсюнден айтханда, ол 1960 жылда Зольск районну Залукодес элинде туугъанды. Орта школну да анда бошагъанды. Андан сора Нальчикде Къабарты-Малкъар къырал университетни инженер-техника факультетине окъургъа киргенди. Анда инженер къурулушчу бёлюмню тауусхандан сора, Тырныауузда ишлеп башлагъанды.

Алгъа ол агъач уста эди. Андан сора мастер, 9-чу къурулуш управленияны бёлюмюню таматасы, бираздан а тамата инженери болгъанды. «Тырныаууз къурулуш» трестни 10-чу къурулуш управлениясына тамата керек болгъанда, Муаедни тийишли кёредиле. Дагъыда бираздан а ол «Жашау къурулуш» акционер обществону коммерциялы директору эди.

Была барысы да он жылны ичинде болгъан ишледиле. Ол кезиуге Элбрус районда къурулуш жаны бла кёп ишле этгендиле, ол санда жашау журтла, курорт, культура, мекямла ишленнгендиле. Дагъыда Россейни Президентини ишлерини управлениясыны, Россейни Саулукъ сакълау министерстволарыны пансионатларыны, Къабарты-Малкъар къырал университетни илму арасыны мекямлары сюелтилгендиле.

Ала барысы да Муаед Талибовични башчылыгъы эм аны тири къатышыуу бла ишленнгендиле. Аладан сора да, Терс-Къол тау чукуйну башында баш астрономия обсерватория.

Минги тау тийресинде кир-кипчик коллекторну, жашау журтланы, Элбрус, Нейтрино элледе сабий садланы къурулушларында да аны уллу къыйыны барды.

Муаед Талибович Тырныаууз эм Минги тау тийрелеринде комсомол-жаш тёлю къымылдауну къурулуш производствода хайырланыргъа да себеплик этгенди. Къурулушда жангы технологияланы хайырланыуну да унутмагъанды. Ишлеринде, гитче механизацияланы хайырланып, юйню сюртген, бояу ишлени бардыргъан энчи бригадала да къурагъанды.

1993 жылда уа аны Тырныауузну администрациясына кёчюргендиле. Анда ол «Жашау-журт коммунал мюлк» биригиуню генеральный директоруну заместители болгъанды.

2000 жылда Гирхожан суу къутуруп келип, шахаргъа уллу хата этген эди. Суу шахаргъа къуюлуп, шахарны ортасын суу басхан эди, къауум иели юйню да ырхы элтип, кёп фатарлы юйлеге да хата жетип. Ол кезиуде Муаед Талибовични, Тырныауузну эм Элбрус районну башха оноучуларыныча, уллу борчлары бар эди аланы аллында: адамла бла сёлешип, аланы сабырлыкъгъа, тёзюмлюкге чакъырыргъа, андан сора да, ол табийгъат къыйынлыкъладан сора хата жетген адамлагъа болушлукъ этген комиссияны председателини заместители болгъаны ючюн жамауат аллында уллу жууаплылыкъ да.

Комиссия хата тюшген жерлени тинтип, юйсюз, фатарсыз къалгъанлагъа журтла алып, аланы ары кёчюре эди, сертификатла бере эди. Кёп жумуш тындырылгъанды ол тынчлыкъсыз кюнледе, адамла танг атмай ишге келип, кече ортасында юйлерине кетип тургъандыла. Комиссияны келечилери келгенлеге халны ангылатхандыла, документлени хазырлагъандыла.

Азубековну къырал программалагъа кёре адамланы тозурагъан юйледен жангы фатарлагъа кёчюргенде да уллу къыйыны барды. Он жылны ичинде шахарда тозурагъан кёп юйге ремонт этилгенди, ала хайырланыргъа да берилгендиле. Алай бла 250 юйюр жангы юйлеге кёчюрюлгендиле.

Элбрус районну жер-жерли администрациясыны башчысыны заместители болуп Муаед алты жыл ишлегенди. Ол заманда да районда жашау журт-коммунал мюлкге эм къурулушха къарагъанды. Аланы ишлерин дайым къарауунда тутханды.

Ишин билген, иш кёллю инсан, Тырныауузну, Элбрус районну да айныууна уллу къыйын салгъан, жерини уллу патриоту Муаед Талибович къырал ишинде да уруна, жамауат жашаугъа да тири къатышханды. Жыйырма жылдан артыкъ «Адыгэ Хасэны» Элбрус районда бёлюмюне башчылыкъ этгенди, ол не заманда да миллетле арасында тынчлыкъгъа, ырахатлыкъгъа уллу эс бургъанды.

Республиканы къурулуш бёлюмюнде кёп жылны бет жарыкълы уруннганы ючюн анга «Къабарты-Малкъарны сыйлы къурулушчусу» деген ат берилгенди. Андан сора КъМР-ни Правительствосуну, Россейни Къурулуш министерствосуну сыйлы грамоталары бла да саугъаланнганды ол. Дагъыда кёп ведомстволу мадайллары, грамоталары барды. 

2021 жылда Муаед Азубеков ишни къойгъанды. Алай юйде тохтап къалмагъанды. Аны «Кавказ.РФ» акционер обществогъа чакъыргъандыла. Анда ол курортла тийресинде бардырылгъан къурулуш ишлеге къарайды.

Муаедни юсюнден Тырныаууздан бир къауум адамгъа да соргъан эдим, ол санда Темуккуланы Абдул-Халимден, ол Элбрус районну транспорт организациясыны таматасыды. Ол былай дегенди ушагъыбызда:

- Муаедни 1988 жылдан бери таныйма. Тырныауузда къурулуш жаны бла ишлей эди. Иш бла байламлы жолугъа тургъанма. Администрациягъа ётгенде уа, бютюныда терк-терк жолугъа эдик. Къыралда уллу тюрлениуле башланнганда, жарсыула, къайгъыла кёп эдиле. Ала бла байламлы Муаедге келсем, аны болушлугъу бла ишими тындырып тургъанма. Бир кюннге уа ненча адам келе эди анга: абаданла, жаш тёлю да. Хар бирине да жарсыууна кёре къолундан келгенича болушханды. Ариу тилли адамды. Сора бир ишни этерге айтса, ол аны чегине жетдирмей къоймагъанды.

Черкесланы Аслижан а жамауат ишлеге тири къатышады. Ол да Азубековну юсюнден кёп жылы сёз айтханды:

- Биринчи ырхы келген заманда шагъырей болгъанма аны бла . Ол заманда анга тарыгъыула бла баргъанма, анга аллай жумушла бла баргъанла менден сора да кёп эдиле. Хар бирине тынгылап, болушаллыгъын, болушмазлыгъын да айтханды. Этерге айтса уа, этмей къоймагъанды. Ырхы ойгъан юйлеге келип, къурулушчулагъа неден башларгъа кереклерин окъуна эсгертип тургъанды. Кеси къурулушчу эди да, аллай ишлени иги ангылайды ол. Районда кёп къыйыны барды. Къайда айланса да, сау жюрюсюн.

Юйюрню юсюнден айтханда, юйдегиси Люсена Лелевна отуз жылдан артыкъны районну аш-азыкъ бёлюмюнде ишлейди. Къызы Марина врач-терапевтди, Нальчикде биринчи номерли поликлиникада урунады, баш иеси КъМР-ни халкъ артисти Тимур Лосанов бла тёрт сабий ёсдюредиле. Экинчи къызы Ирина программист-роботехникди, школда ишлейди. Жашы Астемир а атасыны жолун сайлагъанды. Москвада Къырал къурулуш университетни бошагъандан сора, анда жол-къурулуш жаны бла урунады. Ол да юйдегилиди, юй бийчеси Лорида фармацевтди. 

Алайды да, хурметли тенгибиз Муаед Талибович Азубековну таза ниетле бла бет жарыкълы бардыргъан иши ючюн ыразылыгъыбызны билдиребиз эмда аны ариу ёсдюрген юйюрюне къууанабыз. Жашау жолну тийишлисича бара билген ол керти да уллу фахмуду.