Драматурглагъа ахшы сынау

Къабарты-Малкъарны Жазыучуларыны союзу «Тауланы бирлиги: шуёхлукъну ауазлары» деген ат бла драматургияны республикалы конкурсун бардырады. Ол  регионубузда аллай чыгъармачылыкъны  айныууна себеплик этер эм жангы авторланы ачыкълар мурат бла къуралгъанды.

Конкурсха,  жыл санларына, билимлерине, сынауларына къарамай, ким сюйсе да къатышаллыкъды. Ары орус, къабарты, малкъар тилде жазылгъан, басмаланмагъан, сахнада салынмагъан чыгъармаланы иерге жарайды.

Конкурсха къаллай чыгъармала киредиле:

1. Къабарты-Малкъарны тарыхыны, бюгюннгю жашаууну, маданият хазналарыны юслеринден хапарлагъанла;
2. Россейни халкъларыны бирлигини жылына жораланнганла, эмда миллетлени араларында шуёхлукъну бла келишиулюкню кючлеуге себеплик этгенле.

Чыгъармала пьесаланы жазыуларыны стандартларына келеширге керекдиле: шрифт – Times New Roman, 12 pt, интервалы 1,5. Чыгъарманы басма ёлчеми 120 бетден кёп болмазгъа керекди. Сора чыгъарма нени юсюнден болгъанын къысха хапарлагъан аннотация жазылыргъа, авторну юсюнден информация (Тукъуму, аты, телефон номери, къысха биография) болургъа керекдиле.

Конкурсха къатышырча чыгъармаланы электрон почта бла sp-kbr@mail.ru адресге «Единство гор: Голоса дружбы» деген белгини да жазып, иерге керекди.

Чыгъармаланы конкурсха 2026 жылда 29 январьдан башлап 15 апрельге дери аллыкъдыла. Эм игилерине аланы республиканы театрлары сахнада салырча рекомендация берилликдиле.