Школлада агроклассла ачылгъандыла

КъМР-ни Башчысы Казбек Коковну оноуу бла Къабарты-Малкъарны окъуу юйлеринде агроклассла ачылгъандыла. Бу огъурлу иш «Агропромышленный комплексде кадрла» деген федерал проектни юсю бла «Аш - азыкъ къоркъуусузлукъну технология жаны бла жалчытыу» деген проектни чеклеринде къуралгъанды. Бизни къыралыбызны жерлери эркиндиле, не болумлада да кесини ашы- сууу боллукъду. Мирзеу ёсген сабанла, терек бахчала, кёгет  тахтала, таза черекле – ала барысы да бизни Ата журтубуздадыла. Алай бу байлыкъланы хайырлана билирге керекди. Агрокласслада окъугъанланы бир къаууму эл мюлк бла байламлы усталыкъланы сайларла деген жарыкъ умут барды. Билимли адамла бусагъатда бу бёлюмде  бек керекдиле.

Тырныауузда  агротехнологический лицейде, Красноармейское, Кишпек, Куба элледе  класслада  билимли, иш кёллю сабийле жыйылгъандыла. Бизни регионда бусагъатда эл мюлк айнып баргъаны себепли хар сабий акъылбалыкъ болгъанында кесини жерин табарыкъды.

Агрокласслада физиканы, химияны, биологияны, математиканы терен окъурукъдула, школчуланы табийгъатны, жерни, юй эм кийик жаныуарланы юслеринден тынгылы билимлери боллукъду. Практика дерследе сабийле фермалада иш къалай къуралгъаны бла шагъырейленирикдиле.

Бу классла ачылгъанларындан магъана чыгъар ючюн, бек алгъа кючлю устазла керекдиле. Къабарты-Малкъарда  ачылгъан класслада ишлеген устазлагъа  къошакъ халда эки миллион бла жюз минг сом бёлюннгенди. Быйыл дагъыда «Агропрофессионалитет» деген программа башланады, ол колледжлени ишлерин да эл мюлк бла байламлы этерикди.