Социал магъаналы объектлени игилендиредиле

Бу кюнледе  Черек  районда «Эл жерлени комплекс халда айнытыу» федерал программагъа кёре  12,7 километр чакълы бирде уллу  басымы бла суу  баргъан магистраль быргъыны тартып кюрешедиле. Аны хайыры бла  Къашхатауда, Аушигерде эм Бабугентде  жашагъан онбеш мингден артыкъ  адамны  ичер суу бла сылтаусуз этерге онг табыллыкъды, деп билдириледи  Черек районну администрациясыны пресс-службасындан.

Ишлени кезиуюнде суу жыйылгъан жерни, вентиль орналгъан къуюну эм башха жерлени да тап халгъа келтиргендиле. Аны бла бирге керек заманда  суу баргъан ызгъа ремонт этерча жолну да игилендиргендиле.  Жууукъ заманда сынау халда сууну жиберип кёрлюкдюле, ызы бла толу кючю бла ишлерча боллукъду.

Андан сора да, «Жашау этерге инфраструктура» миллет проектге кёре Жемталада - 4,4 эм  Огъары Малкъарда да  6,6 километр тенгли бирде суу быргъыланы жангыртырча мадар этилгенди. 

 Жууукъ заманда сагъынылгъан проектни чеклеринде Зарагижде бла Бызынгыда спорткомплексле ишленирикдиле. Къашхатауда   Къадыр эм Черкес улу орамланы тапландырлыкъдыла.    Бызынгыда модел библиотека къурулушу башланырыкъды.  Герпегежде бла Огъары Малкъарда мектеплеге да тынгылы ремонт этилликди. Къашхатауну школуну аллында Уллу Ата журт урушда ёлгенлени  эсгертмеси да  жангыртыллыкъды.

Быйыл кёп фатарлы юйлеге  тынгылы ремонт этилирча иш къолгъа алынырыкъды. Андан сора да, жамауат  хайырланнган жерле бла эсгертмеле орналгъан  тийрелени  игилендирирча мадар этилликди.