Сабийле спектакль къалай къуралгъанын кёргендиле

Жыл сайын Россейде онжетинчи январьда  Артистни кюню белгиленирикди. Ол къырал байрамланы санына 2025 жылда киргенди. Нальчикде ТЮЗ (Жаш къараучуну театры) Артистни кюнюне атап, Ачыкъ эшиклени кюнюн бардыргъанды.

Байрам быйыл биринчи кере белгиленнгенликге, ол озгъан ёмюрге кёпюрдю, театрны тарыхы бла байламлыды: онжетинчи январь СССР - ны биринчи халкъ артисти Константин Станиславскийни  туугъан кюнюдю.

ТЮЗ-ну директору Алим Мамсиров бла баш режиссёру Регина Кошокова театргъа  келгенлеге жарыкъ  тюбегендиле. «Биз сизге искусствогъа сюймеклигибизни саугъаларгъа сюебиз», - дегенди Алим Мамсиров. Регина Кошокова уа: «Бюгюн сиз спектакль къалай къуралгъанын кёрлюксюз», - дегенди.

КъМР - ни театр ишчилерини биригиуюню башчысы Майя Фирова артистлени профессионал байрамлары бла алгъышлагъанды. «Бу сыйлы кюнде премьерала бла жарыкъ байрамла ахшы тёре боллукъларына толусунлай ийнанама. ТЮЗ бийик даражада ишлейди. Мындан ары да айныгъанлай туругъуз!» - дегенди Майя Фирова.

Къонакълагъа деп къуралгъан программа бек сейирлик эди. Спектакльни репетициясын биринчи кере кёрюп, сабийле шум болгъан эдиле. Артистле бла режиссёр къалай ишлегенине сабийле аслам эс бургъандыла.  Ызы бла алагъа сахнада чыракъланы магъаналарыны юсюнден айтхандыла. 

Къонакъла театрда кийим цехде хар персонажны энчи сыфаты  къалай къуралгъанын да кёргендиле.

Байрамны ахырында ТЮЗ - ну артисти Жашууланы Мухаммат мастер - класс  бардыргъанды. «Артист хар затны эслерге керекди, - дегенди ол. – Адамланы къылыкълары, кийиннгенлери, сёлешгенлери – хар зат да магъаналыды. Рольну къурай туруп, кёргенинги, билгенинги хайырланаса. Андан сора башхаланы къууанчларын, бушууларын сезмеген, ала бла бирге къууанмагъан неда мудах болмагъан адам артист болаллыкъ тюйюлдю. Жан аурута биледи артист. Биреуню къадарын тюз кесиникича сезеди. Андан сора да кёп затны эсде тутаргъа керекди: рольну текстинден сора да, сахнада ким къайда тургъанын да».

Сора Жашууланы Мухаммат сабийле бла артистле репетициялада этген упражненияланы этгенди. Байрам, кертиси бла да, жарыкъ эди!