Айырмалыла муратларын толтураллыкъдыла

Кёп болмай Нальчикде «Антарес» билим бериу арада  школчуланы арасында химиядан битеуроссей олимпиаданы регион кесеги болгъанды. Бу жол анга республиканы мектеплеринден  9-11 класслада окъугъан 72 адам къатышханды. Ол кюн арада КъМР-ни жарыкъландырыу эм илму министри Анзор Езаов  да болуп,   сабийлеге  олимпиаданы магъаналыгъыны юсюнден айтханды. 

- Олимпиада окъуучугъа ахшы себеплик этген  шартладан бириди. Аны кезиуюнде  билимигизни ачыкъларгъа эм  кесигизни  айырмалы кёргюзтюрге онгугъуз барды.  Финалда хорлагъанла бла призёрла  Бир къырал экзаменлени кезиуюнде  100 баллгъа тийишли  боллукъдула. Алай бла вузгъа  химиядан  экзамен бермей кираллыкъдыла. Былтыр  аллай даражагъа 12 адам  тийишли болгъандыла. Арт жыллада республика жетишимлери бла  алчыланы тизмесинде болгъаны бла да ёхтемленирчады,- дегенди Анзор Клишбиевич.

Министр хунерли сабийлеге болушлукъ тапдырылгъаныны, ол санда окъуучула бла устазлагъа премияны ёлчеми эки кереге ёсгенин, анга деп республикалы бюджетден 6 миллион сом бёлюннгенин да эсге салгъанды.     
Окъуучуланы билимлерине  багъа республиканы сынамлы устазлары КъМКъУ-ну алимлери эм Эколого-биология араны келечсилери берликдиле. Эсепле чыгъарылгъынчы ишлени кимле  жазгъанлары белгисизлей къаллыкъды эм сейфде сакъланырыкъдыла.  

 - Олимпиаданы практика кесегин  ётдюрюрча  тийишли  оборудованиясы бла  лаборатория барды. Бизни баш борчубуз ол  бузукъсуз бардырылырча кёз-къулакъ болургъады.  Сабийле билимлерин сынарча кеси ыразылыкълары бла келедиле. Аны себепли хар бирине да бирча  онг тапдырылады, - дейди «Антарес» араны таматасыны орунбасары Жанна Кештова.

Химиядан  олимпиада 4 сагъатны баргъанды. Къыйын болса да,  ол кезиуге жаш адамла практика жаны бла да билимлерин кёргюзталгъандыла.

Ол кюн кючлерин сынаргъа келгенледен бирлери Геграланы Ренат  бла  Алихан Атажукин айтханларына кёре, ала медицина бёлюмню сайлагъандыла.  Ренат врач,  Алихан а стоматолог болургъа сюедиле.  Олимпиада   муратларын толтурурча  ахшы себеплик этеригин, аны ючюн  хорламгъа итиннгенлерин да букъдурмайдыла.  Ала устазлары химиядан  дерсни иги  ангылатханын, олимпиадагъа хазырланыргъа болушханын, химиядан класслары да  тийишли оборудование жалчытылыннганын  билдиргендиле. Сагъынылгъан шартла, бир бири бла байламлы болгъанларындан сора да, окъуучу билимли болурча, дерсге тартыныргъа да уллу къошумчулукъ этедиле.

Эсге сала айтсакъ, олимпиаданы регионала бла  кесеги 22 предметден бардырылады, ол санда ана тилден да. Быйыл алагъа мингден артыкъ окъуучу къатышадыла. Эришиуле февральны ахырына дери ётерикдиле. Алада хорлагъанла  республиканы атындан финалгъа къатышырыкъдыла.