Газны эсеплеген прибор тийишли халда ишлерча

 Законодательствогъа кёре, счётчикни  болжалы озгъан эсе, кёк отлукъ ючюн   нормативлеге кёре тёлерге тюшерикди. Ол прибор кёргюзтгенден   иги да кёбюрек болады. Аны себепли хар адам да кеслери  анга заманында эс бурургъа эм  показанияланы билдирирге тийишлидиле. Бу жаны бла бузукълукъ этилсе,  нормативлеге кёре тёленнген ахчагъа  перерасчёт  этилмейди. 

Эсеплеген приборлагъа къаратырча неда жангысын салдырырча жашагъан жерлеринде кёк отлукъ бла жалчытхан «Газпром газораспределение Нальчик» неда  «Газпром межрегионгаз Нальчик» биригиулени бёлюмлерине  заявка берирге керекди. Аны «Мой газ» порталда  энчи кабинетде тамамларгъа да жарайды.  Ызы бла счётчикге къаралырча,  Къабарты-Малкъарны  Стандартизация,  метрология эм сынау арасына (ЦСМ)  бериледи.

Эсге сала айтсакъ, приборну ишлерге жарагъан кезиую аны чыгъарылгъан  заманындан тергеледи.  Ол себепден эскисин алып,  къысха заманда алышыргъа тюшмезча, къагъытларына  тынгылы   къарап алыргъа керекди. Счётчикни ишлерге жарагъан кезиуюню юсюнден   техника   паспортунда, квитанциясында неда абонентни "Энчи кабинетинде" жазылады.   Аны моделине кёре,  6 неда 12 жыл бериледи.

Эсеплеген прибор болжалдан алгъа бузулургъа да боллукъду. Сёз ючюн, ичине суу, юзмез кирсе неда башха бир тюрлю шартдан. Аны кезиуюнде счётчик ишлегенликге, юсюнде цифралары тюрленирик тюйюлдюле неда хайырланнган газдан кёп кёргюзтюрюкдю.

Ол асыры кёп ойнагъанына ишекли болсагъыз, газ приборланы жабаргъа керекди.  Ол заманда  да  ишлегенлей тура эсе, бир жерден кёк отлукъ чыгъады неда сетьде ажашхан ток барды.   Газ ийис эте эсе уа, созмай, 04 неда  104 телефон номерлеге сёлеширге тийишлиди.

Газ бла жалчытхан биригиуню келечиси къарагъандан сора  эсеплеген приборну бузулгъанын аны бла бирге пломбасына да тийилмегенине  акт жазарыкъды.

Анга кёре счётчикге ремонт этерге неда алышыргъа тюшерикди. Эски  приборну кетергенлерине, жангысын  салгъанларына эм   опломбировкасына да  абонент кеси хуржунундан тёлерге тюшерикди.

Ызы бла специалист счётчик ишлемеген кезиуде къаллай бир газ къоратылгъанын да санарыкъды.

Аны бла бирге бюгюнлюкде  эсеплеген прибону "акъыллы" тюрлюсюн салса, кёп къайгъыдан кътулур онг  барды. 
Сёз ючюн, устройство болжалы жетсе, показанияланы  кеси жибереди, аланы архивде  сакълайды, къоратылгъан кёк отлукъну тюз эсеплейди,  ол санда  сагъат эм кюн сайын  къаллай бир къоратылгъанын   тергеп берликди.     Бир тюрлю бузукълукъ этилсе мычымай билдиреди, аны хайыры бла диспетчер  объектге  газ бармазча чек салады. Узакъдан окъуна аны иши бла шагъырейленирге онг барды, кёк отлукъну  басымын кюн сайын  азайтыргъа неда кёбейтирге жарайды.   Бусагъатда аны энчи иелиле эм  предприятияла да  салыргъа  боллукъдула.     
 

Акция бла байламлы аны учуз багъасы бла салдырыргъа да онг чыгъыучуду. Биригиу  абонент   эсеплеген приборну багъасын тёлесе,  хакъсыз салыргъа  болушады. Быйыл аллай  акция тинтилмегенди.  Болсада  бир тюрлю сорууу болгъан "Газпром межрегионгаз и газораспределение Нальчик»  компаниягъа бу телефон номерге сёлеширге боллукъду: 8 800 100-09-04.