Юйню жылытыу палахха келтирмезча

Къыш чилле киргенлери бла юйледе да, от этилгенликге, сууугъуракъ болады дегенча тарыгъыуланы дайым эшитирге тюшеди. Юйню жылытыр ючюн, кёпле, бютюнда гитче сабийлери, къартлары, ауругъанлары болгъанла ток печьлени хайырланып тебирейдиле. Алай аладан хата чыкъмаз ючюн а, талай жорукъну унутмазгъа чакъырадыла МЧС-ни регионда бёлюмюнде къуллукъ этгенле.

Ток бла ишлеген печьни сайлагъанда, жангызда заводда ишленнгенин алыгъыз, аны токга салгъандан сора, бир заманда къарамай къоймагъыз, сабийлени къатына жибермегиз, деп эсгертедиле ведомствода. Печьни къабынмагъан жерледе терезе жабыуладан, мебельден, агъач затладан кенгирекде тутугъуз, вилкала бла розеткала къызгъанларына бла къалгъанларына дайым къарагъанлай туругъуз, къызгъаны бузукълугъу болгъаныны биринчи ышаныды. Бир розеткагъа эки прибордан кёбюн бир заманда да салмагъыз. Асыры кёп ауурлукъ жетсе, электроызла къысха замыкание болуп, от тюшерине къоркъуу чыгъарыкъды. Юйден бир ненча минутха окъуна чыгъа эсегиз, розеткаладан электроприборланы чыгъарыргъа унутмагъыз.

Дагъыда  хайырланылгъан электроприборла къоркъуусуз ишлер ючюн эски электроызланы жангылагъа, приборланы жорукълагъа кёре  алышыргъа керекди. Бузукълукълары болгъан, адам кеси аллына жарашдыргъан приборла от тюшюуню сылтауу болургъа боллукъдула. Андан тышында, юйню жылытыр ючюн газ плитаны жандырып къояргъа жарамагъанын да эсде тутугъуз.