Ауругъан кезиуледе ахча къалай тергеледи

Социал фондну регионда бёлюмюнден ангылатханларыча, больничный листге кёре тёлеуле официал халда урунуу келишимни неда граждан-право келишимни (ГПХ) тауусханлагъа бериледиле. Ахчаны кеслерин иш бла жалчытханла бла энчи предпринимательле да алаллыкъдыла, ала борчлу халда страхование фондха тёлеулени кеси ыразылыкълары бла белгиленнген кезиуледе тёлей эселе.

Тёлеуню ёлчеми инсан къаллай бир жылны уруннганына бла больничныйге дери арт эки жылда иш хакъыны орта ёлчемине кёре тергеледи. Ол 8 жылны эм андан асламны ишлей эсе, больничныйи иш хакъы тенгли боллукъду, 5-8 жыл уруннганла  айлыкъларыны 80 процентин, 6 ай – 5 жыл уруннганла уа айлыкъларыны 60 процентин аллыкъдыла. Инсан больничныйге школгъа дери жыл санда сабийге ауругъан кезиуюнде къарар ючюн чыгъа эсе, пособие аны урунуу жыллары къаллай бир болгъанына къарамай, иш хакъыны толу ёлчемине кёре тёленирикди.

Ауругъанда адам юйде тургъан кезиуню биринчи юч кюню ючюн пособияны иш бла жалчытхан жер тёлейди, тёртюнчю кюнден башлап къалгъанын а – Социал фонд. Ахча инсаннга ауругъаныны юсюнден билдириуле фондха келгенден сора 10 ишчи кюнню ичинде тёленеди. Больничныйге юйюнде саусуз болуп анга къарагъаны ючюн чыкъгъан адамгъа пособие толусунлай да фонддан бериледи.        

Больничный листде жазылгъанны инсан къырал жумушланы порталында кёрюрге боллукъду. Анда лист къачан ачылгъаны, болжалы, жабылгъаны, тёленирик ахчаны ёлчеми да жазыладыла.

Бютюн толу билдириуню фондну контакт-арасына сёлешип билирге боллукъду, аны номери: 8-800-1-00000, ол хакъсызды.