От тюшюуню сылтауларындан бири – эски ток чыбыкъла

МЧС-ни регионда бёлюмюнден билдиргенлерича, от тюшюуге келтирген юч эм уллу сылтаудан бири электрика бла байламлыды. Келтирилген эсеплеге кёре, излемлеге келишмеген розеткала, осал качестволу удлинительле бла электроызла терк къабынадыла, алай бла ала хайырланылгъан жер жанып башлайды.

Удлинительле электроприборланы болжаллы халда ишлетиуге жарайдыла, аланы кюйюзлени неда эшиклени тюбю бла тартыргъа жарамайды, тюз да ишигизни бошагъанлай ёчюлтюрге керекди. Бютюнда проводларында ачыкъ жерлери болгъан удлинительлени токга салыу къоркъуулуду.

Приборну токга салгъан кезиуде жилтинле чыкъсала неда розеткала къызсала, ала къошулгъан жерлери тап болгъанларына бла къалгъанларына къарагъыз. Эм игиси аз да бузукълугъу болгъан розетканы алышындырсагъызды. Предохранительле къысха замыканияладан сакълайдыла, ала токга къошулгъан жерледе бузукълукъ бар эсе, жаныуну тыяргъа болушурукъ тюйюлдюле.

Отоуну электрикалы обогреватель бла жылыта эсегиз, аны токга къошхан ызы исси жерине тиймезча этигиз. Ыз неда вилкасы къыза эселе, терк окъуна токдан чыгъарыгъыз. Обогревательни букъудан дайым тазалагъанлай туругъуз, ол да жаныугъа келтирирге боллукъду.

Ведомствода айтханларыча, бузукълукълары болгъан эктроызла бла бир заманда да хайырланмагъыз, бир розеткадан талай приборну ишлетмегиз, юйден чыкъгъан кезиуде приборланы токдан айырыргъа унутмагъыз.