«Жаш тёлю жаратхан жангы жанрла кёп болургъа керекдиле»

20 январьда шёндюгюлю искусствону Павильонунда «Горянка» деген журналны баш редактору Зарина Канукованы «Нартары» деген трилогиясыны биринчи кесегини – «Уэс и Нэс» деген китабыны презентациясы болгъанды.

Ары келгенлени алларында сёлеше, китапны автору Зарина Канукова бу китап «Нартары» деген романны биринчи кесеги болгъанын айтханды. Ол къабарты тилде басмадан былтыр чыкъгъанды эм аны презентациясы Москвада Къызыл майданда ётгенди. Китапны басмадан чыгъарыргъа фахмулу адамла къыйын салгъандыла. Иллюстрацияланы Мадина Саральп жарашдыргъанды.

«Къабарты бла малкъар тилле тас болуп баргъан тиллеге саналгъанларын барыбыз да билебиз, ол себепден аллай болушлукъну тиллени сакълауда магъанасы уллуду. Адабият жанрланы юслеринден айтханда, бизни адабиятларыбызда жаш тёлю жаратхан жангы жанрла кёп болургъа керекдиле», – дегенди китапны автору.

Презентациягъа келгенле иллюстрацияланы жарашдырыуну ал атламларын, ала къалай ишленнгенлерин кёрюрге онг тапхандыла. Жыйылыугъа келгенлени барысы да Заринагъа сорууларын берип, алагъа жууап алгъандыла. Презентацияны къурагъанла анга къатышханлагъа авторну китабын саугъа этгендиле.