Гиртчилиги ючюн – «алтын»

Бу кюнледе Нальчикде панкратиондан Къабарты-Малкъарны чемпионаты ётгенди. Анга битеу да 300-ге жууукъ спортчу къатышхандыла. 

Кеси жыл санында бла ауурлугъунда (62 кг ) Темуккуланы Азамат,  хорлам болдуруп, «алтын» алгъанды. 

Азамат КъМКъУ-ну Педагогика, психология эмда физкультура-спорт  институтуну студентиди. Бу эришиуде болдургъан жетишими бла республиканы жыйымдыкъ командасына тюшгенди. Энди ол СКФО-ну  февраль айда Ингушетияда бардырыллыкъ чемпионатына къатышырыкъды.  

Эришиулеге Темуккуланы Азамат битеу кючюн салып хазырланыргъа кюрешгенди. «Окъууну бла жарау этиуню бирден бардырыргъа жетишип, экисин да эбине жетдирирге тюшеди. Ыйыкъгъа алты кюнню жарау этеме. Тренерим Залим Пшуковха бла устазларыма ыразылыгъымы билдирирге сюеме», - дейди гиртчи жаш.