Тыш къыралгъа тебиреген эсегиз…

Быйылны 20 январьдан башлап 14 жыллары толмагъан сабийлени къырал чекледен ётдюрюу жаны бла жорукълагъа тюрлениуле кийирилгендиле, деп билдиредиле республиканы Курортла эм туризм министерствосундан.  

Алай бла «Россей Федерациядан тыш къыралгъа кетиуню эмда Россей Федерациягъа келиуню низамыны юсюнден» федерал законнга тийишлиликде Абхазиягъа, Белоруссиягъа, Къыбыла Осетиягъа, Къазахстаннга бла Къыргъызстаннга барыр ючюн, сабийге да тыш къыраллы паспорт керек боллукъду. Жолоучулукъ закон кюч алгъынчы, жолоучулукъгъа баргъанла артха да ол халда къайталлыкъдыла.  

Бу жангычылыкъла абаданла бла байламлы тюйюлдюле. Халкъла аралы келишимлеге кёре, ала сагъынылгъан къыраллагъа чекни ётгенде, алгъынча, къыралны ичиндеги паспорт бла хайырланаллыкъдыла. 

Сабийле бла байламлы бу мадар аланы къоркъуусузлукъларын жалчытыр мурат бла этилгенди. Бу жангычылыкъны болушлугъу бла къыралыбыздан акъылбалыкъ болмагъанланы эмда гитчелени жалгъан неда башха адамланы документлерин кёргюзтюп, законсуз чыгъарыуну жолун кеседи.   

Аны бла байламлы ата-аналагъа жолоучулукъгъа атланырдан алгъа, документлени жыйышдырыргъа кереклиси эсгертиледи, сабийге паспортну алыр ючюн, бек азындан бир ай керек боллукъду. Эм игиси, алгъадан аны алып, барлыкъ къыралларын алай сайласалады. Бу ишни къырал жумушланы порталыны, МВД-ны миграция  бёлюмлерини юслери бла тамамларгъа жарарыкъды.

Эсгертиу: сабийге тыш къыраллы паспорт алгъан эсегиз да, туугъаныны юсюнден шагъатлыкъ къагъытны да унутмагъыз, аны чекде бала жангыз да атасы неда жангыз да анасы бла бара эсе, неда тукъумлары башха эселе излерикдиле. Сора бу къагъытны къонакъ юйде, тыш къыралда медицина учреждениягъа баргъанда, неда аллай башха болумлада сураргъа боллукъдула.