Эки ныгъыш

Огъары Малкъарда элни баш жанында мюлкню алмала ёсдюрген бахчасы болуучу эди. Аны тёгереги хуна бла бегитилип, бу эки ныгъыш болгъан жерге «Бората къаты» деп къоя эдиле. Алайда болгъан къабакъ эшиклени атларын таулу адам орусча айтханды, эшитилгенича къатлап. Хунаны элге айланнган жанында абаданла, бир жанында уа жаш тёлю олтуруучу эдиле. Бу суратдагъы акъсакъалланы барын да тохташдырыргъа кюрешгенбиз. Мында Хасаниядан да адамла бардыла. 

Суратда: (солдан онгнга) Бичиланы Хажимурат, ол кезиуде егерь болуп ишлей эди, Ленинни ордени бла саугъаланнган белгили къойчу Жангуразланы Абдулла, аны жанындагъы Уллу Ата журт урушну ветераны Тауболатланы Къурман, Жангуразланы Малик, Къабардокъланы Ахмат, Мамайланы Абу, ол да Жангуразланы Абдулла бла бирге мюлкню къойларын кютгенди, Жангуразланы Абдурахман.

Энди уа жаш тёлю олтургъан ныгъышха эс бурайыкъ. Тюбюнде суратда: (солдан онгнга) Бичиланы Хажимуратны жашы Жамболат, армрестлингден КъМР-ни биринчи чемпиону, Бичиланы Жамал, Гуталаны Азрет, Чочайланы Алий, Бичиланы Махти, Геляланы Хызыр, Алтууланы Ахмат. Бу суратла интернетде терк-терк чыгъыучудула. Суратланы Шахмырзаланы Алексей алдыргъан болур эди.