Этден иги кесек сатылгъанды

Шимал-Кавказстатны управлениясындан билдиргенлерича, былтыр Къабарты-Малкъарда этден (союлмагъан ауурлукъда) эл мюлклени барысында да 115,6  минг тонна сатылгъанды.  Ол буруннгу жыл бла тенглешдиргенде,  7,2 процентге  кёпдю.

Сагъынылгъан кезиуде продукцияны асламысы неда 14,8 проценти эл мюлк предприятилагъа жетеди.   Ол санда  элли фермер мюлкле бла энчи предпринимательле уа  минг тонна бергендиле, башхача айтханда,  26,3 процентге аслам. Аны бла бирге элчи фермер мюлклеге бла энчи иелилиге  2,3 эм 3 процент жетеди. 

Кюзлюкледе иги болум сакъланады

Эл мюлк араны Къабарты-Малкъарда бёлюмюнден билдиргенлерича, кюзлюкледе иги болум сакъланады. Сабанлыкъланы 10-15 сантиметр къар басханыны хайырындан битимле юшюмезча къоруулайды. Анга кёре, тамырларында +0,4 градус сакъланады. Аны бла бирге ол суу бла да кереклиси тенгли бир жалчытырыкъды.

Бюгюнлюкде кюзлюк къылкъылыланы 70 проценти жарсырча тюйюлдю. Болсада бир-бир жерледе эрттерек жетген къылкъыланы чапыракълары бузларгъа жетгендиле, алай ол кёп тюбемейди. Битимлени болумларын игирек тинтирча управленияны келечилери аланы тамырлары бла лабораториягъа алгъандыла. Анда болумлары бла толуракъ шагъырейленирикдиле. Тынгылы эсепле уа кюн жылыннгандан сора чыгъарыллыкъдыла.

Эсге сала айтсакъ, бюгюнлюкде республикада кюзлюк сабанлагъа 65 минг гектар чакълы жетеди. Ол толусунлай  бирси жылланы кёрюмдюсюне келишеди.  

Бу кюнледе мюлкледе къыстау жаз башы сабан ишлеге хазырланадыла. Аны бла байламлы урлукъ салырдан алгъа жерге тийишли семиртгичле чачыладыла. Чууакъ кюнле башланнганлай, техника сабанлагъа чыгъарча боллукъду.

Битимлени экология амал бла къорууларча  

Арт жыллада   Россельхозараны  Къабарты-Малкъарда бёлюмю мирзеу кюени (энтомофагны) трихограмм эм габробракон тюрлюлерин  жаярча амал бла тири кюрешеди.  Аны бла байламлы республиканы эм тыш регионланы да мюлклерин хайырлы гёбелек бла жалчытады.  

Арт заманда республикада теплицалагъа иги кесек  къошула баргъаны бла энтомофаглагъа да сурам ёседи.  Мирзеу кюени (Sitotroga cerealella) жумуртхасы бла битимлени заранлы къуртладан къоруулагъан   трихограмм, макролофус, златоглазка эм башха энтомофагла да кечинедиле.

Мирзеу кюени жумуртхаларын кёбейтгенлери бла бирге, гёбелеклени да жаяргъа онг табылылкъды. Анга кёре, мындан арысында кесибизни мюлклерибизни эм башха субъектлени да тынгылы жалчытырча, сурамны толтурурча  мадар этилликди. 

Сёз ючюн, быйыл  кюени жумуртхаларындан 150 килограмм чакълы алыр умут этиледи. Ол хайырлы къурт-къумурсхаланы ашларына бла  производствогъа да жетерге керекди.