Кёп сабийли аналагъа – кёбейтилген пенсия

Социал фондну регионда бёлюмюнден билдиргенлерича, жангы жылдан башлап кёп сабийли аналаны тёлеулери ёсдюрюлгендиле. Алай бла беш эм андан кёп сабийлери болгъан анала клиент службагъа къырал жумушланы порталыны юсю бла неда фондну бёлюмюне барып, заявление жазаргъа боллукъдула. Фондну 2026 жылгъа бюджетинде бу муратлагъа ахча хазырды.

Тиширыу заявленияны къырал жумушланы порталы бла жибере эсе, сайтда «Перерасчёт размера пенсии» деген бёлюмню, анда уа пенсияны къайсы тюрлюсю ёсдюрюллюгюн – страховой пенсияны жыл сан бла неда сакъатлыкъ бла байламлы тюрлюлери – сайларгъа керекди. Аны сылтаууна «Иное основание» тизгинни, анда уа «Учёт в стаже периодов ухода за детьми» дегенни басаргъа эмда сабийлени атлары, тукъумлары бла туугъан кюнлерин жазаргъа тийишлиди. Заявлениягъа сабийле туугъанларыны юсюнден шагъатлыкъ къагъытланы суратларын да къошаргъа боллукъду. Фонд аланы тинтирикди, къошакъ информация керек болса, аны юсюнден ананы энчи кабинетине билдириу жиберликди.

Быйыл дагъыда талай тюрлениу кючлерине киргендиле. Эндиге дери ананы урунуу жылларына жангыз да тёрт сабийге къарагъан кезиулери киргендиле, энди уа бешинчи, алтынчы, аланы ызларындан туугъан битеу сабийлеге къарагъан жыллары да къошуллукъдула. Жыл бла алты айлары толгъан балалагъа къарагъан кезиу урунуу жыллагъа тергелгенинден тышында, пенсия коэффицентлени да ёсдюрлюкдю: биринчи сабий ючюн коэффициент 2,7 боллукъду, экинчи ючюн – 5,4, ючюнчю эм андан сора туугъанланы хар бирине – 8,1.  

Бу закон быйылдан ишлеп башлагъанлыкъгъа, пенсиягъа 2026 жылгъа дери чыкъгъан кёп сабийли аналаны пенсияларын кёбейтирге онг береди. Алагъа себепликге фондну регион бёлюмюнде тёлеулерин санатырча эм тохташдырырча заявленияланы алгъаракъ алып да башлагъандыла. 

Бютюн толу информацияны фондну контакт арасына ишчи кюнледе сёлешип билирге боллукъду, аны номери: 8-800-1-00000, ол хакъсызды.