«Сизни фахмугъуз къараучулагъа саугъады»

17 январьда Россейде Артистни кюню белгиленеди. Бу байрам къыралыбызда биринчи кере тохташдырылгъанды. 17 январь а бошдан сайланмагъанды. Ол СССР-ни биринчи халкъ артисти Константин Станиславскийни туугъан кюнюдю. Байрам театрны, кинону, циркни артистлерин, жырчыланы да бирикдиреди эмда ала барысы да Россейде бирикген маданият къауум болгъанларын кёргюзтеди.

Артистни кюню Нальчикде Музыкалы театрда да къууанчлы халда белгиленнгенди. Анга жораланнган жыйылыуда Максим Горький атлы Орус, Къулийланы Къайсынны атын жюрютген Малкъар, Али Шогенцуков атлы Къабарты драма театрланы, Гинжи театрны да артистлерин байрам бла алгъышлагъандыла, бир къауумларын а грамотала бла саугъалагъандыла.

Къууанчха келгенле эрттегили эмда бусагъатдагъы артистлени суратларын, Гинжи театрны оюнларындан ариу жасалгъан от жагъаны, башха декорацияланы, «Балкария» эмда «Кабардинка» тепсеу ансамбльлени миллет кийимлерин, тюрлю-тюрлю жыллада ала тийишли болгъан саугъаланы да кёрюрге боллукъ эдиле.

Иги кесек алгъа келгенле, алагъа къарай, эртте театрлада ойнагъан артистлени эсге тюшюре, бир бирлери бла хапар айта, уллу залгъа жыйышхандыла. Бир кесекден къууанчлы ингир башланнганды. Аны Горький атлы Орус драма театрны артисти Мызыланы Аубекир бла Къабарты къырал драма театрны артисткасы Жанна Тхашугоева бардыргъандыла. Ала, келгенлени алгъышлап, байрамны юсюнден къысха айтханларындан сора сахнагъа Атмырзаланы Танзиля, Альмира Абанокова, Жамал Теунов Музыкалы театрны хору бла бирге чыгъып, «Мен сизге дагъыда толкъун къарсларыгъыз ючюн жырларма» деген жырны айтхандыла.

Ызы бла КъМР-ни маданият министри Мухадин Кумахов артистлени байрам бла алгъышлагъанды. «Айтхылыкъ актёр Константин Станиславский былай айтыучу эди: «Фахмулу артист сахнаны патчахыды, аны иесиди, ол адам улуну ниет хазнасын ёрге кётюреди. Инсанланы акъылларын бийлей, сезимлерин къозгъай, бирде къайгъы этдире, бирде кюлдюре эмда жилята да биледи. Къараучуну сагъышха къалдырады». Ол сёзлени сизге да жораларгъа боллукъду. Сиз театргъа искусствогъа къуллукъ этиуню сайлагъансыз, анга чыртда сокъуранмагъаныгъызгъа ийнанама. Сизни фахмугъуз къараучулагъа саугъады»,- дегенди.

Андан сора министр республиканы маданиятында бла санатында кёп жылланы бет жарыкълы къуллукъ этгенлери ючюн артистлени бир къаууму КъМР-ни Маданият министерствосуну сыйлы грамоталары бла саугъаланнганларын айтып, аланы иелерине уллу ыразылыкъ бла бергенди. Ол сыйгъа тийишли болгъанланы араларында уа «Балкария» фольклор-этнография ансамбльни тамата солисти Акъшаякъланы Азамат, баш артисти Анахаланы Дана, Къулийланы Къайсын атлы Малкъар къырал драма театрны артисти Мырзаланы Солтан, Орус драма театрны артисти Тубайланы Раиса бар эдиле.

Министр Мухадин Кумахов а РФ-ни Театрда ишлегенлени союзуну таматасы Владимир Машков къол салгъан сыйлы грамотагъа тийишли болгъанды.

Ызы бла сахнада уллу экранда Владимир Машковну алгъышлауун да кёргюзтгендиле. «Бу байрамны белгилеу тёреге айланырыгъына ишексизме, нек дегенде ол къырал байрамды. Сизни жюрегимден къызыу алгъышлайма, мындан ары да кёп ахшы оюнларыгъыз бла къараучуларыгъызны къууандыра туругъуз», - дегенди белгили актёр эмда жамауат къуллукъчу.

Артистлени Къабарты-Малкъар Республиканы профсоюзларыны бирикген организациясыны таматасы Фатимат Амшокова да алгъышлагъанды.

- Сизни хурметли къараучуларыгъызны бюгюн залда олтургъанлары да айтып турады сиз тутхан иш магъаналы, сыйлы эмда адамлагъа бек керек болгъанын. Сиз къараучулагъа кесигизни толусунлай бересиз, аны ючюн а байрамыгъыз бла алгъышлайма эмда саулукъ, эсенлик тежейме, -дегенди Фатимат Каральбиевна. Ызы бла ол да бир къауум артистге профсоюзланы грамоталарын бергенди. Алагъа тийишли болгъанланы араларында «Къулийланы Къайсын» атлы Малкъар драма театрны директору бла артистлери Жангоразланы Мажит, Будайланы Ольга, Шауаланы Орусбий, «Балкария» фольклор-этнография ансамбльден Аналаны Тахир, Музыкалы театрны солистлери Жуболаны Жамболат бла Оракъланы Замир, Б.Х.Темирканов атлы къырал филармонияны солисти Мусукаланы Джамиля да болгъандыла.

КъМР-ни Театрда ишлегенлерини союзуну таматасы Мая Фирова да артистлеге кёп огъурлу сёзле айтханды. Мындан ары да артистлерибиз къараучуларын къууандырыр ючюн къолдан келгенни аямазлыгъына жыйылгъанланы ышандыргъанды. Нек дегенде бизни миллетлеге ала культураны келтиредиле, жашауну ариу этедиле, деп да къошханды.

Ингирде кёп белгили жазыучуланы назмулары эшитилгендиле. Юч да театрны директорлары: Жангоразланы Мажит Къулийланы Къайсынны «Жашау ёрлеудю», Басир Шибзухов а Хасанбий Бештоковну «Адэщхуэ», Юрий Балкаров да Шекспирни сонетин малкъар, къабарты, орус тилледе кёлден айтхандыла. Малкъар къырал драма театрны артистлери уа «Атлада чариш» деген сахна оюнну кёргюзтгендиле. Россей Федерацияны сыйлы артисткасы Куна Жекамухова «Варвара» пьесадан юзюкню айтханды.

Сахнагъа дагъыда Гинжи театрны артистлери, Къырал Музыкалы театрны солистлери, «Балкария» къырал фольклор-этнография тепсеу ансамбль, «Кабардинка» къырал академиялы ансамбль, Камилла Кушхова, КъМР-ни сыйлы артисти Тимур Гуазов, «Терк къазакъла» да чыгъып, ариу жырлары эмда жарыкъ тепсеулери бла келгенлени кёллерин кётюргендиле.

Къууанчлы ингир «Виват, артист!» деген жыр бла бошалгъанды.