Дунияны, Европаны эм Россейни да чемпиону

Ёсюп келген жаш тёлюбюз жетишимлери бла бизни  къууандыргъанлай турадыла. Аллай саугъа бизге акъ суучу Махийланы Азаматны жашы Умар жангы жылны аллында этгенди. Спортну джиу-джитсу тюрлюсю бла кюрешген жашыбыз озгъан жыл эки кере да даражалы эришиуледе миллетибизни атын айтдыргъанды. Алай бла апрель айда Грозный шахарда Европаны биринчилигинде ол кеси ауурлугъунда  хорлагъанды.

Ол жетишим а анга 27-28 декабрьде Дондагъы Ростовда бардырылгъан дунияны чемпионатына жол ачады. Анда 700 гёжеф кеслерин сынаргъа жыйылгъан эдиле. Бу жол да таулу жаш TWWBJJ халкъла аралы федерацияны версиясы бла кеси къауумунда бек кючлю болгъанын энтта бир кере кёргюзтюп, чемпион атха тийишлилигин тохташдырады.

Умарны жылны ичинде эки даражалы эришиуде да биринчи болгъаны бла эллилери да ёхтемленедиле. Ол дунияны чемпионатындан къайтхандан сора, анга къурманлыкъ да къурагъандыла.

Биз да, хунерли спортчу жашыбызгъа тюбеп, спортха къалай бла келгенин, энчи джиу-джитсуну нек сайлагъанын билирге сюйгенбиз.

– Умар, бек алгъа жетишиминг бла алгъышлайма, сен спортну бу тюрлюсю бла кюрешип башлагъанлы къаллай бир заман болады?

– Мен грэпллингге келгенли 2 жыл чакълы болады. Алай спортха уа беш жылымда берген эдиле. Биринчиден, элде тутушуудан бла аскер къол тюйюшден секциялагъа жюрюп тебирейме. Сора тренерим, джиу-джитсу бла кюреширге боллугъуну юсюнден айтып, Нальчикде жарау этдирген Рустам Юнусну номерин береди да, атам бла анга атланабыз.

Тутушууну бла грэпплингни араларында алай уллу башхалыкъ болмаса да, энчиликле уа бардыла. Мында къолну-аякъны да ачытып хорларгъа эркинлик бериледи. Эркин тутушууда уа аллай зат этерге жарамагъанын барыбыз да билебиз.

– Хар спортчуну да мураты хорламлагъа жетиудю. Аны ючюн а тохтаусуз жарау этерге керекди. Сени  уа къалай къуралыпды кюнюнг?

– Ыйыкъда бир солуу кюнюм барды. Къалгъан кюнлеримде не этеригим такъыйкъалагъа дери белгиленипди. Кюндюз школдан сора тренажёр залгъа жюрюйме. Андан сора уа 19:00 сагъатдан 21:00 сагъатха дери  грэпллингден жараугъа барама. Жаланда ыйых кюн къалама. Аш-суу бла байламлы къайгъыгъа уа эришиуле къаршы бола келген кезиуде киребиз. Не десенг да, кеси ауурлугъунгдан таймазгъа борчлуса. Кече уа заманында жатыу бла хал бир кесек осалыракъды. Нек дегенде тренировкала кеч бошаладыла, андан сора дерслеге да къараргъа керекди.

– Бу дунияны чемпионатына къайта, анда къайсы сермешинг къыйыныракъ эди?

– Алты тюбешиу бардырыргъа тюшгенди. Бек къыйыннга эрменли спортчу бла бардыргъан тёртюнчю сермешими санайма. Финалны юсюнден айтханда, артыкъ бек къайгъыргъан эдим деп айталмайма. Таукел хорлагъан эдим.

– Спортдан тышында окъуучуну башха борчу да барды – школ. Анда уа къайсы дерслени бегирек жаратаса?

– Алгебраны, геометрияны эм физиканы. Магъаналы эришиулеге барыргъа кереклисин ангылап, школдан жибергенлери ючюн энчи ыразылыгъымы билдирирге сюеме.

– Окъууну бошагъандан сора уа, къаллай усталыкъны алыр муратлыса?

– Къоркъуусузлукъну федерал службасында къуллукъ этерча билим алыргъа кюреширикме. Бек жаратама ол ишни.

– Мындан ары спортну бу тюрлюсюнде къалыргъа  деймисе?

– ММА-да кесими профессионал халда сынар  муратлыма.