Адабият газетибизни биринчи атламы

КъМР-ни Жазыучуларыны союзуну таматасы Байтуугъанланы Исмайыл республикада «Къабарты-Малкъарны адабият газетини» биринчи номерини юсюнден билдиреди. «Аны чыгъыуу, – дейди Исмайыл, – регионда тарых, маданият магъаналы иш боллугъуна ийнанама».

Россейни Жазыучуларыны союзуну Къабарты-Малкъар регион бёлюмюню белгиси бла дуния жарыгъын кёрген газет адабиятыбызны тарыхында жангы бетни ачарыкъды. Биринчи атламларын издание къыралны Президенти белгилеген Россейни халкъларыны бирликлерини жылында этгени да бир энчиликди.

Адабият газет ол медиа кенгликде жаланда жангы издание болуп къалмай, Къабарты-Малкъарны адабиятыны айныгъаныны шартыды, чыгъармачылыкъ кючлени бирлешиуге итиниулериди, жазыучуланы, окъуучуланы, кесаматчыланы араларында байламлыкъланы кенгертиудю. Россей Федерацияны Президенти В.В.Путин белгилегенича: «Россейни жазыучуларын бизни сёз искусствобузну тёрелерине сакъ кёзден къарау, бийик ниет, жарыкъландырыу эмда хайырлы ишлеу къыйматлагъа кертилик  бирлешдиреди. Россейни адабият хазнасы эмда бюгюннгю авторланы эм иги ишлери бизни маданиятыбызны, тин байлыгъыбызны эмда кёз къарамларыбызны эркинликлерин кючлеуде бек магъаналыдыла». Биз да ол жууаплылыкъны иги ангылайбыз.

Россейни Жазыучуларыны союзуну председатели В.Р.Мединский адабиятны бла окъууну айнытыргъа эмда анга себеплик этерге керекбиз, дейди, аны оюмуна кёре, окъууну бир зат да алышындыраллыкъ тюйюлдю.

Энчи ёхтемликни редколлегияны къаууму жаратады. Аны сатырларына республикада атлары айтылгъан жазыучула бла адабиятчыла, Россейни Жазыучуларыны союзуну келечилери да къошулгъандыла, ол а бизни изданиябызны Россей адабиятха магъаналылыгъын белгилейди.

Бусагъатда аскерчилерибиз, миллет эмда дин энчиликлерине къарамагъанлай, къалкъан болуп СВО баргъан тийреде Ата журтубузну къоруулайдыла, аланы араларында уа поэтле, жазыучула болгъанларын да айтырчады. Жигитлени юслеринден жаратыладыла эм иги адабият чыгъармала да, ёмюрлюк тин къыйматланы тёгереклеринде жазыучуланы бирикдирип.

Газетни бетлеринде Къабарты-Малкъарны сейир адабияты не жанындан да ачыкъланырыкъды: белгили жазыучула бла бирге къаламларын энди сынай тургъан авторланы жазгъанлары кёргюзтюллюкдюле, кесамат статьяла, рецензияла, аналитика ушакъла басмаланырыкъдыла, адабият халла эмда юбилейле да ол санда.

– Газет жаланда басма чыгъармалагъа майдан болуп къалмагъанлай, ушакълагъа, оюмлагъа эмда чыгъармачылыкъ жаны бла ёсюуге кенглик боллукъду.

«Къабарты-Малкъарны адабият газети», ахшы болсун жолунг! Аны хар чыкъгъан номери ачыкълауланы, илхамны къууанчын келтирсин эмда жангы, жарыкъ атланы жаратсын, – дейди Россейни Жазыучуларыны союзуну Къабарты-Малкъар регион бёлюмюню правленини таматасы Байтуугъанланы Исмайыл.