Къыш суукълада иммунитетни кючлемей жарамайды

Къыш - адамны саулугъуна уллу ауурлукъ жетген кезиудю. Сууукъ эмда къысха кюнледе кёпле тышына чыкъмайдыла,  жылы юйледе къургъакъ хауада уа  жукъгъан ауруула жайылыргъа ёчдюле.  Ол себепден кесекледен, гриппден ауругъанла эмда санлары тюшюп къыйналгъанла да аслам боладыла. Аладан сакъланыр ючюн, саулукъну кючлерге керекди. Аны да бир ненча амалы барды.   

Аш-сууну тюз хайырланыу 

Саулукъну кючлер ючюн аш-сууну тюз хайырланыу бек магъаналыды. Жукъгъан   аурууладан сакъланыргъа бизге  витаминле бла  минералла болушадыла.  Аны себепли С, Д, цинк, селен витаминлери болгъан  жемишлени, кёгетлени, наныкъланы эм къозланы да  кёбюрек ашаргъа керекди.    Айран,  йогурт, кефир, простокваша дегенча ашарыкъла да адамны  хайырлы бактерияла бла жалчытадыла. 

 Суудан кёп ичерге керекди

Жашау журтлада  жылы хауа  адамны чархында сууну азайтады. Ол себепден суудан кёбюрек ичерге керекди.  Сёз ючюн, тюрлю-тюрлю  кырдыкладан чай, морс  да къандан ууландырыучу затланы кетерирге болушадыла. 

Аны бла бирге татлы, семиз эи  жауда бишген  затланы азыракъ ашасагъыз игиди. Ала саулукъгъа хата болмаса, хайыр келтирмейдиле. 

Кёбюрек тепген игиди

Къыш сууукълада кёпле тынчайыргъа излейдиле. Болсада ишлеген, спорт  бла кюрешген адамны саулугъу кючлюрек болады. Санла къымылдагъан заманда къан иги жюрюйдю, эндорфинле бла жалчытылынады эм иммун клеткала да жайылыргъа онг табадыла.

Тышында кюннге сагъат жарым жюрюген саулукъгъа  ахшы себепликди.  Бир тюрлю спорт бла кюрешсенг  лыжалада, сноубордда учсанг а бютюн аламатды. Аллай онгу болмагъан а юйюнде бир тюрлю  жараула этерге, жюзерге барыргъа да боллукъду.

 Жукъу  да багъады

Саулукъну кючлеген амалладан бири жукъуду. Аны кезиуюнде организм кесине келеди, кюч алады: клеткала жангырадыла эм къоруулаучу амалла да игиленедиле. Жукъусу осалны санлары тюшедиле эм тюрлю-тюрлю  ауруула да  жугъаргъа ёч боладыла. 

Хар зат мардасына кёре

Адамны саулугъу иги болур ючюн, ол бир заманда жукъларгъа, ашаргъа, жараула бардырыргъа, ишлерге эм солургъа юйренирге тийишлиди. Заманын  тюз хайырлана билмегенни  организми уллу ауурлукъ (стресс) сынайды. Ол а кёп палахланы сылтаууду.