Магъаналы жумушланы белгилегендиле

Нальчикде биринчи модуль китапханада «Энчи клубха» жюрюгенлени тюбешиулери болгъанды. Ол  санларында къыяулары болгъан сабийлени аналарын, аталарын, алагъа уллу кёллюлюк этмеген адамланы бирикдиреди. Ала бла тюбешиуге бу жол  КъМР-де «Биринчилени атламлары»   регион бёлюмню председатели Аслан Шипшев, бёлюмде ишлеген башхала да келгендиле.

Бу тюбешиуню баш магъаналы борчу - энчи сабийле жамауатны арасында  жерлерин табарча себеплик этиу эм  «Биринчилени атламларыны»  проектлерине, ала бардыргъан ишлеге да къатышдырырча мадарла къурау бла байламлы эди.

Клубда жыйылгъанланы аллында сёлеше, «Биринчилени атламларыны» регион бёлюмюню председатели Аслан Шипшев былай дегенди: «Биз къымылдауну проектлерине битеу сабийле, ол санда санларында къыяулары болгъанла да тири къатышырча этерге ыразыбыз. Бизни борчубуз, аллай энчи сабийле тюрлю-тюрлю башламчылыкъларыбызгъа къатышып, хар бири да кесин уллу эмда шуёх юйюрню бир кесеги болгъанын сезерча этерге  кюрешебиз»,- деп  чертгенди председатель.

Клубда ишлеген Инна Дышекова уа  сабийлени ата-аналары бла къалай ишлегенлерини юсюнден тынгылы хапар айтханды. «Биз  сабийге болушлукъ этер ючюн, бек алгъа битеу ишлени аны ата-анасына  кёз  къулакъ болуудан, себеплик этиуден башларгъа кереклисин дурус ангылагъанбыз. Аны себепли къурагъанбыз  бу  клубну да. Мында анала, атала да жарсыуларын айтыргъа, бир бирлерине сынауларындан юлюш этерге, ангылаулукъну эмда себепликни табаргъа боладыла. Биз, биригип, къыйынлыкъланы хорларгъа кюрешебиз эмда хар кюнде да  себеплик, бир кесек болса да, жюрекге тынчлыкъ, ырахатлыкъ табабыз. Бюгюнлюкде клубну санына  137 адам киреди, алагъа деп  мастер-классла, тюрлю-тюрлю тренингле эмда  абаданлагъа бла сабийлерине чыгъармачы дерсле къурайбыз. Клуб къаллай  ишин да хакъсыз бардырады».

«Биринчилени атламларыны» председателини орунбасары  Валерия Баваш белгилегеннге кёре, быллай тюрлю тюбешиуле айныуларында энчиликлери болгъан сабийлеге биринчилени проектлерине тири къатышыргъа онг бергенлерин чертгенди. «Къаллай сабий да «Биринчилени атламларында» жюрекчиги жаратхан жумушну табарча онгла къураргъа хазырбыз. Жашчыкъланы бла къызчыкъланы ата-аналары, «Энчи клуб» бла бирге жангы башламчылыкъла къураргъа, аланы жашауда бардырыргъа хазырбыз, алай бла  энчи сабийле кеслерин башхаладан айырмалы кёрмезча онгла этерикбиз».

Андан сора да, Валерия Баваш «Биринчилени атламларыны» бла «Энчи клубну» бирге ишлеулерини хайыры мындан ары кесини ахшы жанын кёргюзтюрюгюню  юсюнден да айтханды. Ызы бла озгъан жылда сабийлени къоруулауну халкъла аралы кюнюнде кёп сейирлик ишле бардыргъанларын да чертгенди. «Ол байрам анга къатышхан абаданлагъа, къызчыкълагъа бла жашчыкълагъа  керти да уллу, жарыкъ кюннге айланнган эди, ала  бек кёп къууаннгандыла, кюлгендиле, ойнагъандыла, кюч-къарыу да алгъандыла.

Тюбешиуге къатышхан ата-анала мектепледе  аллай сабийлеге деп къошакъ  классла къуралсала иги боллугъуну, ол зат а энчи балала аслам адам жыйылгъан жерде кеслерин жюрютюрге, айныргъа, билим алыргъа, шуёхла табаргъа да себеплик этерге боллугъуну юсюнден оюмларын айтхандыла. Андан сора да, жамауатны арасында энчиликлери болгъан сабийлеге къалай къараргъа, не этерге кереклисини юсюнден айта турургъа, алай бла хар сабий да кесини энчилигин сынамазча этерге да боллугъуну юсюнден сёз баргъанды. Дагъыда быллай тюбешиуле  бир акъыллыланы табаргъа, аладан сынау жыйышдырыргъа, керек болса уа, болушлукъ табаргъа да боллугъу  чертилгенди.

Тюбешиуню ахырында «Биринчилени атламларыны» бла «Энчи клубну»  араларында быллай тюрлю бирге ишлеуню андан ары айнытыргъа, бютюн кючлендирирге кереклиси да белгиленнгенди. Алай бла  энчи сабийлени ачыкълар ючюн деп, жангы башламчылыкъла къурар мурат барды.