Бютюн аслам адам келгенди

Бу кюнледе КъМР-ни Курортла эм туризм министерствосу озгъан жылны эсеплерин чыгъарыугъа жораланнган жыйылыуун бардыргъанды. Аны кезиуюнде ала 2025 жылда республикагъа эки миллиондан аслам турист келгенин, ол а аны аллында жыл бла тенглешдиргенде, 13,7 процентге кёп болгъанын да белгилеп айтхандыла.

«2025 жылда Элбрус районну, Тырныаууз шахарында болгъан табийгъат къыйынлыкълагъа да къарамай, бизге туристлени келиулерини санын аз этген угъай да, ёсдюрюрге окъуна къолубуздан келгенди. Быйыл солургъа, таулада лыжала, чанала бла учаргъа, ариу тау хауа бла солургъа эки миллиондан аслам адамгъа къонакъбайлыкъ этилгенди. Андан сора да битеу солуу, айбат жерлеге келгенлени саны аслам болгъанын да айтыргъа тийишлиди», - дегенди жылны эсеплерин чыгъара, Къабарты-Малкъарны курортла эм туризм жаны бла министри Аскер Бифов.

Битеу турист муниципал районлада ахшы жанына тюрлениуле эсленмей къалмагъандыла. Алай, бютюнда кёп адам а Зольск районнга келгенлерин айтыргъа тийишлиди. Ала алтмыш беш процентден аслам болгъандыла. Жылны ичинде бу муниципал районну солуу жерлерине 250 мингнге жууукъ адам баргъанды.

Жангы жылны байрамларыны эсеплерин чыгъарып къарагъанда уа Къабарты-Малкъар Республикагъа жюз мингден аслам турист келгенди.

«Энчи белгилеп, солуу жерлеге адамла бютюн аслам келген кюнледе битеу тийишли службала да бек тынгылы ишлеп, бир тюрлю хатасыз эм автомобильле аслам болуп чырмау къуралмай ашырылгъандыла. Бу ишде да жууаплы ведомстволаны тириликлерин белгилеп айтыргъа тийишлиди», - деп чертгенди министр Аскер Бифов.

Туристле Россейни кёп жерлеринден келедиле, бютюнда аслам адам а Москвадан эмда Санкт-Петербургдандыла. Бизни республикада солургъа сюйгенле къоншу регионлада да бардыла. Алай бла Краснодар, Ставрополь крайладан, Ростов областьдан, Шимал Кавказны Чечен, Ингуш, Дагъыстан, Север Осетия-Алания республикаларындан, дагъыда башха регионладан да кёпле бар эдиле. Ала асламында экеу -экеу келгендиле эмда, бек аздан, орта эсеп бла юч кечени туруп кетгенледиле.