Сугъарылгъан жерлеге къошулгъанды

Былтыр Къабарты-Малкъарда сугъарылгъан жерлени ёлчемин 7 минг гектаргъа жетдирирге онг табылгъанды. Анга кёре бюгюнлюкде мюлкледе жауун эм тамычы халда сугъаргъан машинала ишлейдиле.  

Сугъарылгъан жерлени асламысы, неда 5,2 минг гектары Прохладна районнга жетеди. Андан сора да, Лескен, Май, Терк, Чегем эм Урван районла да   560, 460,450, 360,100 эм 40 гектар барды.

Регионну Эл мюлк министерствосундан билдиргенлерича, алада кёбюсюнде мирзеу ёсдюрюрюледи. Аны бла бирге жемиш бла  наныкъ орнатылгъан мюлкледе ол тири хайырланылып тебирегенди.

Къыралны жанындан болушлукъ тапдырылгъаныны себебинден жыл сайын арендаторла жауун, спринклер эм тамычы халда сугъаргъан оборудованияны  алыргъа онг табадыла.

Эсге сала айтсакъ, сугъарылгъан жерлеге къошула баргъаны агропромышленный комплексни айнытыуда болмагъанча  магъаналыды. Аны кенг хайырланыу тюрлю-тюрлю ёсюмлюкледен бай тирлик алыргъа эмда иги кесек  файда тюшюрюрге  себеплик этеди.