Эки элде - жарсыулу болум

Тюнене бла бюгюн республикада эки элде от тюшюу бла байламлы жарсыулу ишле болгъандыла, деп билдиреди РФ-ни МЧС-ни КъМР-де Баш управлениясыны пресс-службасы.

Биринчиси тюнене ингирде Заюково элде болгъанды.    Специалистле тохташдыргъаннга кёре, аны сылтауу  газ баллон атылгъаны бла байламлыды. От мычымай 100 квадрат метрге жайылгъанды. Бу къыйын болумда тёртеулен ачыгъандыла. Аланы терк окъуна  Республикалы клиника больницагъа тапдыргъандыла. Анда отдан ачыгъанлагъа бакъгъан бёлюмню таматасы Хаджиланы Артур асламлы информация органлагъа билдиргеннге кёре, бир саусузну хали къыйынды. Къалгъан ючюсю да орталыкъ къыйын халдадыла. Алагъа битеу керекли болушлукъ тапдырылады. 

Экинчи от тюшюу а бюгюн эрттенликде 8 сагъатда Эски Черек элде болгъанды. Къутхарыучула ары мычымай тебирегендиле. Келгенлеринде, юйде эр кишини ёлюгюн тапхандыла. Жарсыулу болумну сылтауу алыкъа тохташдырылмагъанды.