Иги кесек жол жангыртылгъанды

Кёп болмай  Чегем районда  жоллагъа тынгылы ремонт этиу жаны бла программаны эсеплегендиле эм быйыл тамамланырыкъ жумушланы да белгилегендиле. Эсге сала айтсакъ, аны баш борчу адамланы болумларын игилендириргеди.

Алай бла былтыр Набережная орамны 1,8 километр кесеги жангыртылгъанды. Аны кезиуюнде жолгъа эки къат асфальт салгъандыла, тротуарла ишлегендиле эм кече жарырча чыракълы чыпынла  орнатылгъандыла эм къоркъуусузлукъу жалчытырча темир буруула да тартылгъандыла. Аны хайыры бла  Революционная орамдан транспорт ауурлукъну кетерирге, тауушну,  аварияланы азайтыргъа эм экология болмну да игилендирирге   онг табылгъанды.
Озгъан   муниципал субсидиягъа Чегем шахарда  Пачев атлы орам жангыртылгъанды.  Андан сора да,  жангы школгъа баргъан  Къабарты орамгъа да тынгылы ремонт этилгенди.

Арт кезиуде къыралда ич туризм къыстау айный барады. Россейлиледен тышында, тыш къыраллы къонакъла да кёбюсюнде кеси машиналары бла жолоучулукъну сайлайдыла. Аны бла байламлы " Жашау этерге инфраструктура "  миллет проектни чеклеринде туризм объектлеге баргъан жолла тап эм къоркъуусуз болурча аслам иш этиледи.  

Бу жаны бла Къабарты-Малкъарда магъаналы эм уллу объектледен бирине Экинчи Чегем-Булунгу жолну санаргъа боллукъду. Аны 27 километр кесегинде тынгылы ремонт ишле бардырылгъанлы иги кесек заман болады. Тау жерледе, къыйын табийгъат болумну да алсакъ, борчларын толтурурча подряд организацияны келечилерине иги да къыйналыргъа тюшеди. 

Проектге кёре эки машина бир жолгъа ёталмагъан жерледе жол жети метрге кенгертилгенди. Кече жарытырча чыракъла тартылгъандыла эм жаяу жюрюгенлеге тротуарла, машинала сюелирча, къараучу жерле да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды. 

Бюгюнлюкде специалистле Чегем чучхурланы бла Булунгуну эм Эл-Тюбюню арасында жолну 25 километр кесегин игилендиргендиле. Аны чеклеринде 214 метр тенгли бирде  тогъуз кёпюр да  жангыртылгъанды.
 Былтыр  жаз башында  жолгъа экинчи къат асфальт салыннганды эм башха жумушла  да тамамланнгандыла.