Эсгертме къанга орнатхандыла

Орта кюн Нальчикде КъМАССР-ни халкъ артисти Сотталаны Къаншау жашагъан юйню къабыргъасында аны 91-жыллыгъына жораланнган эсгертме къанга тагъылгъанды. Ол жумушха республиканы Правительствосуну таматасыны орунбасары Марат Хубиев, республиканы маданият министри Мухадин Кумахов эм Сотта улуну жууукълары бла тенглери къатышхандыла.

Къаншау Хаждаутович кёп жылланы «Кабардинка» ансамбльни солисти болуп тургъанда. Артда кеси «Элия», «Налькут», «Асса», «Эльбрус» тепесу къауумланы къурагъанды.    

Кесини къысха сёзюнде Марат Хубиев Сотта улуну адамлыкъ эм профессионал шартларыны юсюнден айта, закий Къайсынны сёзлерин эсге тюшюргенди: «Бу жигит залгъа тауланы башындан секирип тюшгенча, барыбыз да аны учуууна солуубузну тыйып къарарча эталгъанды».

Министр Мухадин Кумахов а аны республиканы тепсеу искусствону айнытыугъа салгъан къыйыныны чеги болмагъанын белгилегенди.