Окъутууну амалларын кёбейтедиле

Къабарты-Малкъарда мектеплени бла школлагъа дери билим берген махкемелени тапландырыу андан ары бардырылады. 2019 жылдан бери жыйырма тёрт жангы мектеп ишленнгенди. Алада уа саулай да 14 мингден аслам окъуучугъа жер барды. Школгъа дери билим берген бёлюмлени уа 55 жангысы къошулгъанды,  83 мектеп эмда 5 сабий сад тапландырылгъанды.

Озгъан жылны кезиуюнде, сёз ючюн, Нальчикде «Билим бериу» миллет проектни чеклеринде юч школда жангы корпусла ачылгъандыла, алагъа 2300 окъуучу сыйынырыкъды. Онекинчи номерли мектепни аллай бёлюмюне уа 800 сабий жюрюйдю. Андан сора да, 2025 жылда экинчи номерли лицейни, онжетинчи школну эмда 73-чю номерли сабий садны мекямларын тапландырыу жаны бла къурулуш ишле бошалгъандыла.

2026 жылда да, билим бериуню модернизациялау жаны бла башха-башха проектлени жашауда бардырыуну чеклеринде окъуу махкемелени асламысын тапландырыргъа, жангыларын да ишлерге  белгиленнгенди. Алай бла энди Кёнделенде да сабий сад ишленирикди. Эки жылны ичинде 43 мектепни  бла 15 садикни ремонтларын бошар мурат барды.

Андан тышында да, школлада тапландырыу бла бирге тюз илмуланы, тарихли технологияланы окъутурча энчи классла, эркин китапханала, спорт залла эмда ашханала къуралгъанларын чертирчады. Аны себеплиги бла уа окъуучулагъа билим алырча, спортну эмда кеслери  сюйген чыгъармачылыкъны тюрлю-тюрлюлери бла кюреширча амалланы кёбейгенлерин да белгилерчады.