Иги кесек къагъанакъ туугъанды

Былтыр жылны ахыр кюнюнде Къабарты-Малкъарны медицина учрежденияларында 39 къагъанакъ туугъанды: 16 жашчыкъ бла 23 къызчыкъ, деп билдириледи КъМР-ни Саулукъ сакълау министерствосуну пресс-службасындан.

Ведомствода айтханларыча,  декабрьде   825 къагъанакъ туугъанды. Былтыр   аланы саны 9837-ге жетгенди .

Эсге сала айтсакъ, арт  жыллада республикада болумну иги жанына тюрлендирирча аслам иш этиледи. Аны хайырындан былтыр къагъанакъланы арасында ёлгенлени санын иги кесекге  азайтыргъа онг табылгъанды.

Министр кёргенине бюсюрегенди 

Кёп болмай КъМР-ни саулукъ сакълау министри Рустам Калибатов тынгылы ремонт этилген медицина организациялада болуп,  аланы болумлары бла шагъырейленнгенди.

Ол санда Республикалы бийик медицина технологияланы  арасында жангыртылгъан регистрация бёлюмюне къарагъанды. Мында саусузлагъа къысха заманда эс бурулурча мадар этилгенди.  Аны бла бирге врачлагъа тийишли мебельлери эм башха затлары бла аламат  кабинетле къуралгъандыла. Андан сора да, терк болушлукъ тапдыргъан машинагъа жолчукъ жарашдырылгъанды. Аллай амал къыйын  саусузланы арбачыкъ бла къыйналмай  кийирирге себеплик этерикди.

Министр  реанимация бла  паллиатив бёлюмледе саусузлгъа къалай багъылгъананына да  къарагъанды. Мында жангы медицина оборудование хайырланылады  эм палаталада жатханла да  ырахат болурча мадар этилгенди.

Саулай алып айтханда, Рустам Калибатов    кёргенине бюсюрегенди эм эсгертиуле да этгенди.  

Жангы мардалагъа келиширикди

 Бу кюнледе  "Саулукълу эм тири жашау бардырыу" миллет проектге кёре Александровка микрорайонда сабий  поликлиникагъа тынгылы ремонт этип бошай турадыла. Ол алгъаракъладан бери республиканы кёп профильли сабий клиника больницасына бойсунады.

Бюгюнлюкде мекямны тыш къабыргъаларын сюртюп, башын жабып, терезеле салып, инженер коммуникацияларын тартып эм башха жумушланы да тамамлап  бошагъандыла. Энди ичинде къабыргъаларын сюртюп-бояп кюрешедиле.

Тынгылы ремонт ишледен сора  медицина учреждение 6,6 минг сабийге къарарыкъды. Ол быйыл биринчи кварталдан кеч къалмай  хайырланыргъа  берилирге керекди.