Жолла мардалагъа келиширча

Быйыл "Жашау этерча инфраструктура" миллет проектге кёре Урван бла  Прохладна районланы бирге къошхан  Къара Суу -Благовещенка жолну 12,7 километрине тынгылы ремонт этилликди. Ол таш жол болгъаны себепли жауунлада бла къыш сууукълада водительлеге къыйналыргъа тюшгенди. Аны себепли мында жашагъанла  жолгъа къаралырча эрттеден бери  тилегендиле.  Алай бла ишлени кезиуюнде аны мурдорун кючлерикдиле, эки къат асфальт жаярыкъдыла эм  тёрт кёпюр  жангыртыллыкъды, деп билдириледи КъМР-ни Транспорт эмда жол мюлк  министерствосуну пресс-службасындан.

Андан сора да,   Эски Черек, Жангы- Осетин эм  Благовещенка хуторлагъа  баргъан жоллагъа, саулай алып айтханда, 11 километр тенгли бирде жоллагъа  къараллыкъды. 

Ведомствода билдиргенлерича, жол объектлеге тынгылы ремонт этилсе, социал инфраструктураны игилендирирге, мектепге, амбулаториягъа,  администрациягъа эм башха объектлеге да къыйналмай барыргъа  жарарыкъды. 

Былтыр сагъынылгъан миллет проектни чеклеринде регионну жети элине баргъан жолла жангыртылгъандыла. Ол санда къоншу субъект бла чекде кесеклерине да къаралгъанды.