Тиширыу ана болургъа хазырлана эсе

Ауурлугъу болгъан  тиширыу  кесин къалай жюрютюрге, сакъларгъа, не этерге, этмезге кереклисини юсюнден  КъМР-ни Саулукъ сакълау министерствосуну штатда болмагъан акушер-гинекологу, республиканы Перинатал арасыны  акушер-физиология  бёлюмюню башчсысы Лолита Темботова былай айтады:

-Сабийден ауурлугъу болгъан кезиуде, тиширыуну хали иги, кеси уа насыплы болургъа керекди. Сёзсюз, битеу ол затлада анга юйюрю, жууукъ адамлары уллу себеплик этерге борчлудула.

Ана болургъа хазырланнган тиширыу кеси уа, биринчиден, ашына сакъ болургъа керекди. Артыкъ кёп ашамазгъа, жаулу, къууурулгъан затладан кери турургъа тийишлиди. Бек игиси уа, ашында кёгетле, жемишле, аладан этилген салатла, чабакъ, тенгиз продуктла кёбюрек болсунла. Кюннге юч-тёрт кере ауузланса да,  игиди. Сууну асламыракъ ичсе керекди. Сёзсюз, кеч этдириучю ичгилени ичерге уа арталлыда жарамайды. Ала къагъанакъны саулугъуна бек хаталыдыла. Экинчи кюннге къалгъан ашланы да ашамаса игиди.

Экинчиден, къайда, неде да тазалыкъны сакъларгъа кюрешигиз. Озгъан жыл жукъгъан ауруула бютюн кёп жайылгъан  эдиле. Аны себепли ол затдан кесин сакъларгъа, аслам адам жыйылгъан жерлеге бармазгъа, къайгъы этмезге керекди. Битеу ол затла энди тууарыкъ баланы саулугъуна заран салыргъа боллукъдула.

Ючюнчюден, ауурлугъу болгъан тиширыу  хауада кюн сайын асламыракъ айланыргъа керекди. Юйде да терезени ачып, таза хауа кирирча этерге тийишлиди.

Тёртюнчюден, сабийден ауурлугъу болгъан тиширыу тюрлю-тюрлю  байрамланы белгилеуге  азыракъ къатышса, бек игиси олду.  Къаллай байрамны да  жууукъ адамларыны арасында ётдюргенден табы уа жокъду.

Алайды да, башда айтылгъан жорукъланы сакълагъан ауурлугъу болгъан тиширыу, аны энди тууарыкъ баласыны да саулукълары  иги болурла.