«Театрыбыз жамауатыбызда сыйлы жер алады, мындан ары да алай болуруна ийнанама»

Къулий Къайсын атлы  Малкъар къырал драма  театрны директору, КъМР-ни  халкъ  артисти Жангоразланы Мажит  озгъан жылда театрда бардырылгъан ишни юсюнден айтханды эм  халкъны келе  тургъан Жангы жыл бла алгъышлагъанды.

- Малкъар труппа озгъан жыл тохтаусуз ишлегенди. Биз Нальчикде кесибизни мекямыбызда, гастрольлада, фестивальлада кёргюзтген спектакльлерибиз эки жюзден артыкъ болгъандыла. Ол бек уллу къыйынды, артистлеге эм спектакльлеге къыйын салгъан башха специалистлерибизге жюрек ыразылыгъымы билдиреме. Бир бирни ангылап, билеклик этип, ишлегенбиз.

Чыгъармачылыкъ иш кюн сайын жангылыкъны излейди, театр халкъны жашауу бла байламлы болургъа керекди. Аны бла байламлы Максим Горькийни «Саудюгерчиле» пьесасына кёре Родион Овчинников салгъан спектакльни белгилерге сюеме: мында толу кюбюрле болгъан юйюрде келишим болмагъаны кёргюзтюледи. Ол бизни бюгюннгю жашауубузгъа жууукъду. «Къыбыла сахна» деген  тёрели фестивальда «Саудюгерчиле»   кёп  дипломлагъа тийишли болгъанды.

Хар спектакльге барыбыз да жаныбызны бир къыйырын салабыз. Хар спектакльни солууунда, жанында коллектив сезиледи. Аны ангылап, театргъа келип тургъан къараучула сау болсунла. Шёндюгю дунияда маданиятны бир шарты – театрды. Ийнанама, биз бардыргъан ишни жаш адамла ёчюлтмезле деп. Быйыл КъМР-ни сыйлы артисткалары Токумаланы Раяны  бла Будайланы Ольганы  85-жыллыкъларын белгилегенбиз, алача, театргъа кертичиле келирле деп ышанабыз. Малкъар театрны хар адамы халкъда белгилиди, ала жамауатыбызда сыйлы жер аладыла, мындан ары да алай болсун!

Дагъыда бир спектакльни юсюнден энчи айтыргъа сюеме. Бусагъатда СВО барады, кёп таулу жашла сермешлеге киредиле. Халкъны къайгъысын сахнада кёргюзтюрге сюе эдик. Ол умут бла  Шварцны пьесасына кёре «Кечеден тангнга» деген спектакльни ингушлу  режиссёр Ахмед Льянов салгъанды. Бу ишге жюри бийик багъа бергенди, Уллу Хорламны 80-жыллыгъына аталгъан республикалы конкурсда  биз хорлагъанбыз.

Театр жаланда фестивальлада жетишимлеге жетер ючюн ишлемейди, бизни баш муратыбыз – халкъыбыз бла байламлыкъды. Малкъар театр бюгюнлюкде ана тилибизни сакълаугъа да уллу къошумчулукъ этеди. 
Жангы жылны аллында хар таулу юйюрге тынчлыкъ, мамырлыкъ, сюймеклик тилейме. Халкъыбыз айнысын! Адабиятыбыз, театрыбыз, газетибиз, китапларыбыз, илмубуз, спортчула да – хар затыбыз да алгъа барсын. Битеу дуниягъа  да игилик тилейме. Насыпсыз дунияда энчи бир адам насыплы болургъа амалы жокъду. Барыбызгъа да келсин насып! Биргелей!