Къабарты-Малкъар Республиканы Башчысы К.В.Коковну Жангы жыл бла алгъышлауу

Къабарты-Малкъарны багъалы жамауаты!
Кёп да бармай Жангы 2026 жыл юйлерибизге кирликди. Бусагъатда уа, жюрекни къозгъагъан такъыйкъалада, келир заманны юсюнден сагъыш эте, хар не да иги боллугъуна ишексизбиз. Ол ийнаныулукъну бизге Ата журтубузну махтаулу къоруулаучулары, энчи аскер операция баргъан тийреледе Россейни миллет сейирлери, аны келир заманы ючюн къазауат эте тургъан аскерчилерибиз бередиле.
Алагъа айтырыгъым: сиз чынтты жигитлесиз. Кишилигигиз, батырлыгъыгъыз ючюн да сизни бла ёхтемленебиз. Къабарты-Малкъар, деменгили къыралыбыз саулай да сизни биргегизгедиле.
 Кетип баргъан 2025 жыл тынч болмагъанды, алай биз аны бет жарыкълы ётгенбиз. Экономика жаны бла белгилеген битеу борчларыбыз толгъанларына ишексизме. Промышленностубуз, эл мюлкюбюз, къурулуш эмда туризм бёлюмлерибиз да иги ёсюм кёргюзтгендиле.

Халкъыбызны къолайлыгъы да ёсгенди. Социал жаны бла битеу белгиленнген жумушла да толтурулгъандыла. Онла бла школла, сабий садла, больницала, поликлиникала, маданият, жаш тёлю эмда спорт мекямла ишленнгендиле эмда жангыртылгъандыла. Жолларыбызны, шахарларыбызны бла эллерибизни болумлары да игиленнгендиле.

Битеу ол жетишимле бек алгъа республикада жашагъанланы жигер урунууларыны хайырындан болдурулгъандыла. Багъалы жерлешлерим,  жашауубуз ырахатлы болуруна  барыгъыз да уллу къыйын салгъаныгъыз ючюн жюрек ыразылыгъымы билдирирге сюеме.

Кетип баргъан жылда биз Уллу Ата журт урушда Хорламны 80-жыллыгъын кенг халда белгилегенбиз. Ол аламат байрамны белгилеу Россейни кёп миллетли халкъыны бирлиги не тюрлю болумлада да  кючлю болгъанлай къаллыгъын кёргюзтгенди.

Ол бирлик барыбызны да бек багъалы хазнасы болгъанына шагъатха къыралыбызны Президенти Владимир Владимирович Путинни оноуу бла келе тургъан 2026 жыл Россейни халкъларыны бирлигини жылыча тохташдырылгъанды.

Туугъан республикабызны, саулай деменгили къыралыбызны да кючлендириуде бир ниетли болсакъ, не тюрлю къыйынлыкъланы да хорларыгъыбызгъа сёз да жокъду.

Жангы жылгъа муратларыбыз, къууумларыбыз, огъурлу ниетлерибиз толлукъларына уллу ышаныулукъ бла киришебиз. Алай болур ючюн, адамларыбызны жашаулары игиленир, сабийле не къадар кёп тууар ючюн, ала саулукълу эмда насыплы болуп ёсер ючюн, жаш адамларыбыз тынгылы билим алыр, хунерликлерин бла усталыкъларын башларына жаратыр ючюн, тамата тёлюбюз жамауатны эмда къыралны къайгъырыуларын дайым сезер ючюн биз къолубуздан келгенни аярыкъ тюйюлбюз. 

Багъалы шуёхла!
Жангы жылгъа бек аз къалгъанды. Сизни къатыгъызда бек жууукъ адамларыгъыз боллукъдула – юйюрлеригиз, сабийлеригиз, ата-аналарыгъыз, туудукъларыгъыз, шуёхларыгъыз да. Хар юйге, хар юйюрге, туугъан Къабарты-Малкъарыбызгъа, сюйген Ата журтубуз Россейге да жюрегими теренинден алгъыш эте, ырахат жашау, жашнау да тежейме! Жангы жылда бек уллу муратларыгъыз толсунла!
 Жангы 2026 жыл бла, багъалы жерлешлерим!