Эллиле сакълагъан китапхана

КъМР-ни Башчысы Казбек Коков Исламейде шёндюгюлю модуль библиотеканы иши бла шагъырлейленнгенди, ол сентябрьде элни Маданият юйюнде ачылгъан эди. Аны юсюнден республиканы оноучусу кесини телеграм-каналында билдиргенди.

Китапхана «Юйюрню тутуругъу эм маданиятны инфраструктурасы федерал проектни чеклеринде «Юйюр» миллет проектни жашауда бардырыу бла байламлы къуралгъанды. Быллай модуль библиотека Басхан районда экинчиди, биринчи Кишпекде 2023 жылда «Маданият ишни къурау» федерал проектни чеклеринде  ачылгъан эди.

Саулай къыралда окъуна быллай китап араланы ачыу ол инновация ишди, нек дегенде шёндюгюлю модуль китапханала алгъын заманлада болгъан библиотекаладан башхадыла. Сёз ючюн, Исламейде китапхананы бай китап фонду, андан сора да, аны шёндюгюлю компьютерлери бла терк ишлеген Интернети да барды. Адамла олтургъан заллары эркиндиле,чыгъармачылыкъ иш бла кюреширге эм китап окъуп солургъа да аламат онглары къуралгъандыла.

Мында дагъыда жаш тёлюню профессионал жаны бла ёсерге ахшы онгла бардыла, абадан тёлюню компьютерге юйретирге, китапханагъа келгенле, компьютерде китапланы окъугъандан сора да, ишлерге да боллукъдула. Къысхасы, окъуйма дегеннге битеу онгла къуралгъандыла, экзаменлеге хазырланыргъа, билимлерин ёсдюрюрге онг къуралгъанды. Бери школчула, студентле, абаданла келирге боллукъдула, алагъа сынаулу ишчиле керекли затларын табаргъа болушурукъдула. Быллай китапхана Басхан районда жашагъанлагъа аламат саугъады, аны бла жаланда хайырланыргъа керекди.