Жукъугъа хайырлы жорукъла

Байрамланы кезиуюнде кёплерибиз кюнню низамын сакъламайбыз - жукъларгъа кеч жатабыз, тюшге дери тёшекден туралмай къыйналабыз. Алай бла уа ишге чыгъар кезиуге солугъанны орунуна арыгъаныбызны сезебиз. Алай болмаз ючюн а, аз-аздан низамны къайтарыргъа, жукъларгъа кеч къалмай жатаргъа керекди, дейди КъМР-ни Саулукъ сакълау министерствосуну психиатрияны бла наркологияны клиника арасыны медицина психологу Ирина Котова.

- Каникулладан  ишге чыгъаргъа 2-3 кюн къалгъанда, жукъларгъа сагъат, сагъат жарым тенгли алгъаракъ жатаргъа керекди. Эрттенликде уа ишге къопхан заманда турургъа кюрешигиз. Хау, солуу заманда жылы тёшекде кёбюрек жатаргъа сюебиз. Алай ишге чыкъар кезиуде низамгъа къайтмасакъ, кесибизге къыйын боллукъду, -дейди Ирина Тимофеевна.

Жукъларны аллында бир сагъат алгъа телефонну бир жанына салыргъа, телевизорну ёчюлтюрге керекди. Андан эсе китап окъугъан хайырлыды. Кюнню узунуна тири болургъа керекди, деп юйретеди бизни ушакъ нёгерибиз. Юйден чыгъаргъа, паркда ашыкъмай жаяу жюрюрге керекди, таза хауада спорт бла кюрешген да саулукъгъа, жукъугъа да хайырлыды.  

-  Кофеинни къояргъа, неда азайтыргъа тийишлиди. Эсиртген затланы да хайырланмагъыз, ала жукъуну бузадыла. Бу жомакълы заманны  юйюрюгюз бла бирге болугъуз, саулугъугъузну сакълагъыз,-дейди Ирина Котова.