Илму ишин эм кючлюге санагъандыла

Бизни мектепледе окъугъан сабийлерибиз, гитчеликден да хунерликлерин ачыкълай, башха-башха дерс  олимпиадалада жетишимли болсала, сёзсюз, ол шарт ышандырмай, кёллендирмей  да  къоймайды. Аны бла бирге уа ала Окъуучуланы битеуроссей дерс олимпиадаларында, жаланда  республика даражада угъай, аны къырал урумунда да призёрла болсала неда хорламгъа тийишли кёрюлселе.

Жангуразланы Нюржан да аллай окъуучуларыбызны санындады. Ол бюгюнлюкде «Кюн шахар» сабий чыгъармачылыкъ академияны хунерлилеге лицейини онбиринчи классынданды. Алгъадан чертсек, бу кюнледе къызчыкъ дагъыда кесини бир уллу жетишими бла къууандыргъанды.

Алай бла Нюржан Чечен Республиканы Махачкъала шахарында бардырылгъан «Гордость нации-2025» 6-чы Битеуроссей жамауат  премияны округлу кезиуюнде «ПОКОЛЕНИЕ УМ» деген бёлюмюнде хорлагъанды. Жюрини келечилери Жангуразланы къызчыкъны экологиядан илму проектин эм кючлюге санап, бийик багъа салгъандыла. Нюржан бу премиягъа къатышханланы араларында жыл саны бла эм гитче болгъанын да белгилерчады.

Ол биринчи классдан да «бешлеге» окъугъан сабийди. Эм алгъа Нальчикни  32-чи номерли мектебине жюрюгенди  эмда окъуучу болгъан ал кезиуюнден окъуна башлап, олимпиадалагъа къатыша, хунерин ачыкълагъанды. Алай бла ол сегизинчи классда болгъанында, сагъынылгъан лицейни таматалары, къызчыкъны алай иги окъугъанын билип, кеслерине чакъырадыла. Нюржан а, ары дери бир жылны ичинде тёрт тюрлю олимпиадагъа къатышып, аланы барысыны да шахар урумларында хорлагъан эди. Андан арысында кезиулеринде уа бирлеринден лауреат даражагъа,  бирсилеринден а хорламгъа тийишли болгъанды. Алай бла уа «Кюн шахар» сабий чыгъармачылыкъ академияны хунерлилеге лицейине анга окъуу жылны ортасында окъуна сынаусуз кирирге эркинлик берилгенди.

- Олимпиадалагъа биринчи классдан да къатышама. Мени алайлыкъ бла билимге итиндиргенле, сейирими къозгъагъанла  а башланнган мектепде устазым Юлия Владимировна Карданова болгъанды. Андан бери кёп жерлеге къатыша эмда жетишимли бола келеме. Энди къыралны аслам окъуу юйюне ЕГЭ-сиз кирирча эркинликге да жетишгенме,  алай эсе да, «Гордость нации» премиягъа  къатышыргъа, кесими анда да сынаргъа сюйгенме,-дейди Нюржан  бизни бла къысха ушагъында.

Аны регион эмда къырал даражалы урумларын сагъынсакъ, 2024 жылда  Окъуучуланы битеуроссей дерс олимпиадаларында биологиядан шахарда эмда регионда урумлада хорламла болдургъанды. Ол жетишими ючюн а КъМР-ни Башчысыны саугъасына да тийишли кёрюлгенди. Биологиядан аны юйретген эмда хазырлагъан устазла уа Марьяна Аслановна Нагоева бла Алина Георгиевна Баскаева болгъандыла.

2025 жылда уа къызчыкъ дагъыда ВСОШ-ха экологиядан къатышыргъа мурат этгенди. Барыбыз да билгенликден, ол а дерс олимпиадалада  эм къыйыннга саналады. Алай эсе да, Нюржан аны шахардагъы кезиуюнде хорлап, региондагъы урумунда уа призёр болгъанды. Аны ахыр къырал даражалы кезиуюне къатышыргъа эркинлик да берилип, анда да призёргъа саналгъанды. Бу дерсден а аны Рустам Хаталиевич Пшегусов бла Галина Анатольевна Кярова тюшюндюргендиле эмда хазырлагъандыла. Бу жетишимлерини себеби бла уа анга, белгилегенибизча, къыралыбызны  бир ненча вузуна ЕГЭ-сиз кирирге эркинлик берилгенди. Ол алыкъа усталыкъны эмда  окъуу юйню  сайлауунда тохташып къалмагъан эсе да, керти илмула бла байламлы бёлюмде окъуругъун а биледи.

Анга Бир къырал сынаулагъа хазырланыргъа артыкъ керек болмай, заманы аслам болгъаны себепли уа  кеси да репетиторлукъ бла кюрешеди. Башланнган класслагъа жюрюгенчиклени битеу да дерследен юйретеди. Таматаракъланы уа химиядан, биологиядан, орус тилден, математикадан эмда  ингилиз тилден тюшюндюреди. Аны бла бирге уа кеси да келир жылда студент болургъа хазырланады.

Белгилегенибизча, хар сабийни да жетишимине биз да къууанабыз. Аланы жетишимлери уа жаланда билимлерин кёргюзтюу бла да чекленмейдиле. Аны бла бирге ала окъугъан мектепни, анга билим берген устазланы да даражаларын, ишге къалай берилгенлерин да ачыкълайдыла.